«Чөҥөчөктөрө суох куорат» аахсыйа норуоту түмтэ

Балаҕан ыйын 1-6 күннэригэр куорат управалара хас эмэ сыл устата куорат көстүүтүн буортулуу, олохтоохторго мэһэйдии турбут чөҥөчөктөрү, сиртэн чоройон турбут турбалары түөрэргэ күрэхтэстилэр. Нэдиэлэ иһигэр барыта 942 “эбийиэк” туоратыллыбыт.

Күрэх кыайыылаахтара:

I миэстэ – Киин уокурук. Бирииһэ – 2 мөлүйүөн солкуобай;

II миэстэ – Сайсары уокуруга. Бирииһэ – 1,5 мөлүйүөн солкуобай;

III миэстэ – Строительнай уокурук. Бирииһэ – 1,5 мөлүйүөн солкуобай.

Маны таһынан, Гагарин, Автодорожнай уонна Октябрьскай уокуруктар 100-тан тахса чөҥөчөгү түөрэн, биирдии мөлүйүөн солкуобайы ыллылар.

Баһылык бэлиэтээбитинэн, харчы олохтоохторго төннүөҕэ – эһиил тиэргэннэри тупсарыыга уонна территориялары сайыннарыыга туттуллуоҕа.

Дмитрий Садовников саҥа эстафетаны биллэрдэ – бас билии көрүҥүттэн тутулуга суох тэрилтэлэр икки ардыларыгар.

Уокуруктарга эбии араас аадырыстарынан 597 чөҥөчөк түөрүллүбүт. Бүгүҥҥү күн туругунан итинтэн тэрилтэлэр, салайар хампаанньалар уонна урбаан структураларын күүстэринэн 313 чөҥөчөк хостоммут. Халлаан туран биэрдэҕинэ, балаҕан ыйын бүтүөр диэри күн ахсын үлэ ыытыллыаҕа.

Баһылык көҕүлээһинэ норуоту түмтэ: манна управалары тэҥэ девелопердар, дьокутааттар, ыраах айаҥҥа сылдьар суоппардар ассоциациялара уонна көннөрү олохтоохтор кыттыстылар. Баһылык сорудаҕынан саҕаламмыт аахсыйаны «Кибор», «ЖКХ Губинский» салайар хампаанньалар, «СЭТТЭ» хампаанньа бөлөҕө, «Монолит» ХЭТ, «УК Виктория-плюс» ХЭТ уо.д.а. өйөөтүлэр.

Бэлиэтээн эттэххэ, Дьокуускайга «Кытыы нэһилиэктэр – куоракка» диэн өссө биир аахсыйа бара турар. Ол түмүгүнэн киин куорат сквердэригэр уонна болуоссаттарыгар 519 мас олордулунна.