Быйылгы халаан хайа да сыллааҕар уустук буолуо диэн сабаҕалыыллар

Бу туһунан СӨ Гражданскай оборонаҕа уонна нэһилиэнньэ олоҕор куттал суох буолуутун хааччыйар миниистирин бастакы солбуйааччыта Айаал Вензель «Радио России-Саха» араадьыйаҕа кэпсээтэ, диэн министиэристибэ пресс-сулууспата иһитиннэрдэ.

Улахан харыы Өлүөнэ өрүскэ Ленскэйгэ, Хаҥалас уонна Нам оройуоннарыгар, Дьокуускай куорат кытыы нэһилиэктэригэр, ону таһынан Бүлүү өрүскэ Үөһээ Бүлүү оройуонугар, Халыма өрүскэ Үөһээ уонна Орто Халыма оройуоннарыгар тахсара сабаҕаланар. Улахан харыы кэмигэр уу таһыма кутталлаах бэлиэни 1-2 миэтэрэ аһарыан сөп.

Халааны сэрэтиигэ уонна туоратыыга 17 266 киһи, 3 442 тиэхиньикэ, 27 көтөр аал (ол иһигэр 8 БАС — пилота суох салгын систиэмэтэ) уонна 526 уу тэрилэ үлэлиэ. 113 суһал бөлөх тэриллибит.

Кулун тутар 26 күнүгэр ыытыллыбыт бэрэбиэркэ кэнниттэн эрэгийиэннээҕи сэрэтэр систиэмэ бэлэминэн ааҕыллыбыт. Уопсайа 28 617 киһи батар 303 быстах кэмҥэ олорор пуун бэлэм. Бу пууннар орон таҥаһынан, аһынан-үөлүнэн, уунан хааччыллыахтара.