Быйыл «Сахалыы дьыктааҥҥа» 4404 тыһыынча киһи кытынна

Дьокуускайга Төрөөбүт тыл, сурук-бичик күнүн чэрчитинэн 12-с төгүлүн ыытыллыбыт аахсыйа түмүгүн таһаардылар. Ол курдук, былырыын кыттааччы ахсаана 3534 эбит буоллаҕына, быйыл элбээбит – 4404 киһи. Онно Чурапчы, Уус Алдан, Сунтаар, Мэҥэ Хаҥалас, Нам, Дьааҥы улуустарыгар ордук элбэх киһи кыттыбыта бэлиэтэннэ.

Бэлиэтээн эттэххэ, быйылгы дьыктааҥҥа норуот суруйааччыта Василий Яковлев-Далан «Кэриэн ымыйа» хомуурунньугуттан быһа тардыы ылыллыбыта.

Национальнай бибилэтиэкэ түөрт былаһааккатыгар 150 кэриҥэ киһи дьыктааны суруйбут. Ол курдук, биир да сыыһата суох суруйан, «туйгун» сыананы ыллылар: устудьуон Степан Быкалыров, бибилэтиэкэрдэр Диана Бырдака, Арчыына Константинова, социальнай педагог Михаил Рожин уонна филолог Прасковья Кузьмина.

Дьыктааҥҥа «5» уонна «4» сыананы ылбыттар тэрийээччилэртэн уонна аахсыйа партнердарыттан – «Ситим» медиа-бөлөхтөн, «Айар» кинигэ кыһатыттан уонна «Емеян» киинэ тыйаатырыттан өйдөбүнньүк бэлэхтэри туттулар.

Аахсыйаны көҕүлээччи, ХИФУ саха тылын кафедратын сэбиэдиссэйэ Дария Чиркоева бэлиэтээбитинэн, сыл аайы кыттааччы ахсаана элбээн иһэр.

Манна даҕатан эттэххэ, киэҥ далааһыннаах аахсыйа тэрийээччилэринэн СӨ Национальнай бибилэтиэкэтэ, М.К. Аммосов аатынан ХИФУ ХИНТУоКИ буолаллар.