Быйыл 18 земскэй тренер үлэҕэ анаммыт

Бу күннэргэ спорт миниистирэ Леонид Спиридонов “Зэмскэй тренер” федеральнай бырагыраама кыайыылаахтарын кытта көрсөн кэпсэттэ. Быйыл Саха сирин араас улуустарыгар 18 тренер хантараагынан үлэлии барыаҕа.

Санатан эттэххэ, бу бырагыраама былырыын Арассыыйа бэрэсидьиэнин Владимир Путин ыйааҕынан олохтоммута. Былырыын Саха сиригэр 3 бастакы земскэй тренер үлэҕэ анаммыта. Быйыл өрөспүүбүлүкэбитигэр 18 квота көрүллүбүт.

Бырагыраамаҕа хапсыбыт тренердэр биэс сылга хантараак баттаһан хамнастаах үлэлэнэллэр. Ону таһынан биирдэ бэриллэр 2 мөл. солк. харчынан ылаллар. Быраабылаҕа олоҕуран, исписэлиистэри 50 тыһыынчаттан кыра нэһилиэнньэлээх сиргэ ыыталлар. Быйылгы бырагырааманан 12 улууска уонна биир куорат уокуругар тренердэр үлэлии тиийэр буоллулар.

Спорт министиэристибэтэ иһитиннэрбитинэн, сүүмэрдээһин биир кыайыылааҕынан өрөспүүбүлүкэ ааттаах-суоллаах спортсмена, мас тардыһыыга сүҥкэн ситиһиилэрдээх Лия Плотникова буолбут. Кини бу иннинэ үс сыл төрөөбүт улууһугар Мэҥэ Хаҥаласка тренердээбит, иитээччилэрэ номнуо Арасыыйаҕа тиийэ ситиһиилэрдээхтэр эбит. “Земскэй тренер” бырагыраамаҕа кыайан Лия Плотникова Ньурба улууһугар тренердии барар буолбут.

Ол курдук, земскэй тренердэр быйыл Анаабырга, Дьааҥыга, Горнайга, Кэбээйигэ, Муомаҕа, Намҥа, Ньурбаҕа, Өймөкөөҥҥө, Сунтаарга, Тааттаҕа, Хаҥаласка, Эбээн-Бытантайга, Жатайга үлэлэрин саҕалыахтара. Сорох улуустарга спорт араас көрүҥнэринэн 2-3-түү тренер тиийэр буолбут.