Бырдахтан харыстанарга норуот ньымалара

Минньигэс сыттаах ванилины кырдаайы, бырдах сирэрин бары билэбит. Ууга булкуйан суурадаһын оҥорон баран баатанан бистиэххэ сөп. Пульверизаторга кутан ыстарабыт. Оҕо кириэмигэр ванилин бороһуогун кутан бистэххэ эмиэ туһалыыр, оҕо аллергиялаабат, улахан да киһиэхэ барсар.

Бырдах гвоздика, базилик, эвкалипт уонна анис эфирдээх арыытын сытыттан куттанар эбит. Аптекаларга атыыланар арыыларын ылан духуу курдук соттуохха сөп. Чүмэчмигэ, кутаа уокка кутан сыт таһаарыахха сөп. Уокка холбонор фумигатор анал убаҕаһа бүттэҕинэ, 100 бырыһыаннаах эвкалипт сүмэһинин туттабыт.

Чеснок – бырдахха эмиэ олус туһалаах. 5-6 өлүүскэтин ньыһыйан баран сытыара түһэбит, ууга суурайан пульверизаторга кутан туттабыт. Холобур, балаакканы ыстарыахха сөп.

Валериана сыта уонна табах буруота кумаары киэр кыйдыыр.

Камфора сытын эмиэ сөбүлээбэт.

Өтөххө үүнэр көнө сүрүннээх дороххой от – локуура (пырей) сытыттан кумаар куотар.

Черемуха эбэтэр базилик сибиэһэй сэбирдэхтэрин кырбаан, сыт таһааран, бырдаҕы үүрүөххэ сөп.

Чааһынай дьиэҕэ, даачаҕа түннүк анныгар бузина олортоххо, үөнү-көйүүрү дьиэҕэ киллэрбэт. Түннүк анныгар помидор үүнэрэ эмиэ үөнтэн-көйүүртэн харыстыыр.

Тиит эриэхэтигэр сылабаарда оргутуҥ, кутаа уокка кытыан, эрбэһин отун быраҕан буруолатыҥ.  

Сытыган эрбэһин отун оргутан биһиннэххэ, бырдах ыстаабат.

* * *

Маны таһынан, өбүгэлэрбит курдук тиэргэҥҥэ ынах, сылгы киитинэн түптэлиибит. Аныгы дьон ынах сааҕын оннугар үөрэ өтүн эрийэн (закрутка) уматар, түптэлиир буолбуттар.