Бырайыактаах ыччат грант ылыан сөп

Кулун тутар 24 күнүгэр, ыччат өрөспүүбүлүкэтээҕи бэстибээлин чэрчитинэн, "Росмолодежь.Гранты" регионнааҕы куонкурус биллэриллэн турар. Манна сайаапкалары муус устар 14 күнүгэр Москва бириэмэтинэн күнүс 13:00 чааска диэри тутуохтара.
"Саха Өрөспүүбүлүкэтэ Арассыыйаҕа регионнартан бастакынан грант былаһааккатын арыйан турар. Бэйэлэрин идиэйэлэрин уонна бырайыактарын көҕүлээччи ыччат үбүнэн-харчынан өйөбүл ылалларыгар, бырайыактарын олоххо киллэрэллэригэр кыах бэриллэр. Манна 14-ттэн 35-гэр диэри саастаах өрөспүүбүлүкэ олохтоохторо кыттыахтарын сөп. Грант саамай кыра кээмэйэ 5 тыһ. солк, муҥутуур улааппыта –1 мөл. солк. Хас биирдии кыттааччы баар 18 номинацияттан бииригэр  1 бырайыагынан 1 сайаапканы биэрэр бырааптаах" – диэн  СӨ Бырабыыталыстыбатын Бэрэссэдээтэлин солбуйааччы Ольга Балабкина иһитиннэрдэ. 
Сайаапканы ФГАИС "Молодежь России" https://myrosmol.ru/events/62e76f4e-ba9f-4abc-ac2a-6ce15aa845bc ыытаҕыт. Граҥҥа кыттыы туһунан сиһилии информацияны, методическай ыйынньыгы эмиэ бу сайка билсиэххэ сөп.