Быраапкытын туһаныҥ

Ол курдук, өскөтүн счетчиккыт үлэлиирин үрдүнэн эһиэхэ өҥө иһин төлөбүрү быһыллыбыт нуорманан аахпыт буоллахтарына, хаттаан аахтарар бырааптааххыт.

Биллэрин курдук, уунан, уотунан, гааһынан туттуу иһин төлөбүрдэри биһиги счетчик көрдөрүүтүгэр олоҕуран оҥоробут. Оттон бу көрдөрүүнү өҥөнү тиксэрээччилэр ый 20-25 күннэригэр булгуччу киллэрэри ирдииллэрин бары тутуһабыт дуо? Дьиҥэр, ити чахчылары кэмигэр уонна тиһигин быспакка киллэрии ордук бэйэбитигэр наадалаах.

Ол курдук, холобура, счетчик көрдөрүүтүн кэмигэр укпатахпытына, өҥөнү тиэрдээччи бастакы үс ыйга төлөбүрү орто көрдөрүүнэн ылар, оттон 4-с ыйтан — быһыллыбыт нуорманан, о.э. 50-100 % ыараханынан!

Оттон счетчигыҥ үлэлиир буоллаҕына, эн хаттаан аахтарыаххын сөп.

Уоту кэмчилииргэ сүбэ:

Дьиэҕэ-уокка туттуллар тэриллэртэн күннэри-түүннэри электричество уотугар наадыйааччынан, ол эбэтэр уоту «ороскуоттааччынан» холодильник буолар. Ол эрээри, исписэлиистэр сүбэлииллэринэн, холодильникпыт сүрүн камератын температуратын +3...+5°C, тоҥорор камератын -18°C туруордахпытына уонна кэмиттэн кэмигэр ириэрэн сынньатар буоллахпытына, ыйга 1200 солк. кэмчилиэххэ сөп эбит.

Онон, этэргэ дылы, чэпчэкитик төлүүргэ быраапкытын туһаныҥ!