Бырааһынньыктааҕы салют буолбат

Бу күн уулуссаҕа атыы-тутуу, "Саха" НКИХ быһа эпиирэ, «Трудовая Слава Якутии» өрөспүүбүлүкэ үлэһиттэрин чиэстээһин, бырааһынньыктааҕы оһуохай, кэнсиэр күүтэллэр.

Кыайыы күнүн бэлиэтиир тэрээһиннэр “Тиэргэнинэн ыллыыбыт” кэнсиэртэн саҕаланыахтара. Ыам ыйын 7 күнүгэр “Туймаада саллаата” мемориальнай комплекска сибэкки дьөрбөтүн ууруу былааннанар. Ол киэһэ Кыайыы болуоссатыгар сылын аайы ыытыллар “Өйдөбүнньүк чүмэчитэ” буолуоҕа. Ыам ыйын 8 күнүгэр “Кыайыы нэһилиэнньиктэрэ” сүүрүүгэ күрэхтэһии, Кыайыы знамятын иилии, эдэр аармыйа этэрээттэрин үөрүүлээх параада ыытыллыа.

Кыайыы пааркатыгар Кыайыы стелатыгар “Саха буойуннарын чиэстээһин” сибэкки дьөрбөтүн ууруу уонна бэтэрээннэр көрсүһүүлэрэ былааннанар. Ыам ыйын 9 күнүгэр сибэкки дьөрбөтүн ууруу уонна үөрүүлээх параад буолуоҕа.

Быйылгы “Өлбөт үйэлээх полк” хаамыыга СВО кыттыылаахтарын дьиэ кэргэттэрэ эмиэ кыттыыны ылыахтара. Тэрээһин туһунан уопсай иһитиннэрии “Өлбөт үйэлээх полк” киин штабын быһаарыытынан биллиэҕэ, тоҕо диэтэххэ куттал суох буолуута бастакы миэстэҕэ турар.

Санатан эттэххэ, билигин өрөспүүбүлүкэҕэ 7 сэрии бэтэрээнэ олорор. Ил Дархан Айсен Николаев таһаарбыт ыйааҕынан Кыайыы күнүгэр Аҕа дойду Улуу сэриитин бэтэрээннэригэр 1 мөл. солк. кээмэйдээх төлөбүрдэр барыта оҥоһуллубуттар.