Былдьаһыктаах күннэри баттаһа

Хаар ууллуор диэри бу тиэмэни алаадьы курдук эргитэ сылдьан суруйабыт. Хайыыр да кыах суох, бу – саас аайы куорат сүрүн кыһалҕата, тыын боппуруоһа. Саатар, халлааммыт кэнники сылларга кыһын устата «хаһаанан» баран, кулун тутар-муус устар ыйдарга сөҥүү күүскэ түһэр буолла. Өссө сороҕор нуорматын аһаран, хас эмэ бүк куоһарара үксээтэ. Утары ыраастаан, тиэйэн испэтэххэ, куораппыт Венецияҕа кубулуйар кутталлаах.

Үлэ хаамыытын хонтуруоллуохха сөп, оттон сөҥүү түһэрин хайдах да тохтоппоккун, хаар боппуруоһа биирдэ саба тутан быһаарыллыбат. Ол эбэтэр бу иннинэ эрдэттэн дьаһаммыт да тэрилтэлэр хос тиэйтэрэргэ күһэллэллэр.

Куорат баһылыгын солбуйааччы Владислав Слепцов үөрэх тэрилтэлэрин, хаарбах туруктаах дьиэлэр тиэргэннэриттэн хаары хос тиэйии хаамыытын хонтуруоллуур бэрэбиэркэлэри саҕалаата. Манна даҕатан эттэххэ, бу нэдиэлэ ортото уһуйааннар, оскуолалар, элбэх кыбартыыралаах дьиэлэр тиэргэннэриттэн хаар барыта тиэллэн бүтүөхтээх диэн сорук турбут.

Баһылык солбуйааччыта иһитиннэрбитинэн, дьиҥэр, бу үлэҕэ 408 хаарбах туруктаах дьиэ тиэргэнэ хабыллара былааннаммыт, онтон 390 тиэргэнтэн хаар тиэйиллибит. Ол эрээри сорох сиргэ үлэ хос ыытыллыахтаах.

Владислав Слепцов этэринэн, Дьокуускай куоракка сааскы санитарнай ыраастаныы уонна тупсарыы үлэтэ түмүктээх буоларын туһугар кэтээн көрүү тиһигин быспакка барыахтаах, ханнык баҕарар кыһалҕа суһаллык быһаарыллыахтаах. Дьэ, ол иһин бу иннинэ сааскы ыраастааһын үлэтин салайар ыстаап нэдиэлэҕэ биирдэ мунньахтыыр эбит буоллаҕына, муус устар 3 күнүттэн күн аайы ыытыллар, ол иһигэр өрөбүллэргэ эмиэ. Бары туһааннаах тэрилтэлэр, олохтоох бэйэни салайыныы уорганнара, «Якутдорстрой» АУо, «Жилкомсервис» МУТ үлэлэрин отчуоттуу олороллор. «Быһыы-майгы барыта хонтуруолга тутуллар», – диир Слепцов. 

 Муус устар 7 күнүнээҕи туругунан Сэбиэскэй Аармыйа 50 сыла уулуссаҕа турар анал полигоҥҥа 524 тыһ. куб. миэтэрэ иэннээх хаар тиэйиллибит.

Графиктан хаалыы суох

Ааспыт нэдиэлэ бүтүүтэ куорат баһылыгын солбуйааччы Владимир Дорожкин айан суолларыгар, ол иһигэр уу мустар намыһах сирдэригэр хаары ыраастыыр үлэ хайдах бара турарын бэрэбиэркэлээтэ. Ити күн баһылык солбуйааччыта Софронов, Лермонтов, Тургенев, Дальняй уулуссалары, Ленин проспегын көрдө-иһиттэ.

– Хаары ыраастааһыҥҥа күннэтэ 70 кэриҥэ тиэхиньикэ, күн-дьыл туругуттан көрөн, 40-тан 60-ҥа тиийэ киһи үлэлии тахсар. Графиктан хаалыы суох. Муус устарга үлэ түмүктэнэрэ былааннанар, – диэн иһитиннэрдэ Владимир Дорожкин.

Суол оробуочайдара өрөбүлү билбэттэр

Балаһаны аҥаардас суһал ыстаап, туһааннаах тэрилтэлэр отчуоттарынан толорор тутах. Арай чахчы бу үлэҕэ сылдьар дьон мэтириэттэрэ арыый тыыннаан, киэргэтэн биэрээрэй? 

Баскыһыанньа, Ленин проспега. «Доҕордоһуу болуоссата» оптуобус тохтобулугар «Якутдорстрой» үлэһиттэрэ (сэлиэччиктэринэн көрөн, киһи тута быһаарар – Аапт.)  тротуары ыраастыы сылдьаллар. Бачча таба түбэһэн баран, ама, ааһа бара туруом дуо, тутан ылан кэпсэтэргэ сананным. Хата, улгумнук сөбүлэстилэр.

Семенов Иннокентий Валерьевич, Больницкай Семен Васильевич – «Якутдорстрой» АУо суол оробуочайдара. Иккиэн соторутааҕыта саҥа үлэлии киирбиттэр.

– Үлэ күнэ хастан, хайдах саҕаланарый?

– Сарсыарда 8 ч. баазабытыгар мустабыт. Онтон биригэдьиир күннээҕи былааммытын, сорудахпытын этэр, салгыы эбийиэктэринэн тарҕаһабыт. Сороҕор  халтарааны утары үлэҕэ ыыталлар. Холобур, куорат олохтоохторуттан элбэх үҥсүү киирэн, бэҕэһээ тротуардарга кумах ыспыппыт.

– Бүгүҥҥү былааҥҥыт? Бу Ленин проспегар уопсайа хас буолан сылдьаҕыт?

– Сэттэ-хас киһи. Дьиҥэр, куорат үрдүнэн элбэхпит, бары араас эбийиэктэринэн сылдьаллар. Бүгүҥҥү сорудахпыт – Ленин проспегын тротуардарын ыраастааһын. Чөмөхтөөбүт хаарбытын тыраахтар кэлэн тиэйиэхтээх.

– Өрөбүлэ суох үлэлиэхтээххитин билэ-билэ киирбиккит дуо?

– Билигин куорат үрдүнэн санитарнай ыраастааһын үгэнэ, онон икки ый маннык үлэлиигит диэн тута сэрэппиттэрэ, ол оннугар хамнаскыт үчүгэй буолуо диэн эрэннэрбиттэрэ. Муус устар 1 күнүттэн өссө үрдэтэллэр үһү.

Туох да ыарахаттары көрсүбэппит, сүрүнэ хаар уулла илигинэ ыраастаан бүтэриэхтээхпит диэн күүстээх сорук турар, – диэн кэпсээтилэр.

1300 куб. миэтэрэ муус

«Теплоэнергия» АУо иһитиннэрбитинэн, тэрилтэ биригээдэлэрэ күннэтэ кыһын устата мунньуллубут мууһу ыраастыыллар. Муус устар 7 күнүнээҕи туругунан барыта 1300 куб. миэтэрэ муус тиэйиллибит. Кэнники күннэргэ туһааннаах үлэ Автодорожнай, Киин уонна Сайсары уокуруктарыгар барбыт.

Тэрилтэ телеграм-ханаалыгар суруйарынан, исписэлиистэр кыһалҕаны  суһаллык быһаарарга бэлэмнэр. 

Шефтэһии үтүө холобура

Дьокуускай аэропордугар хаары, мууһу кытта «өрө тустуу» аэродромҥа уонна порт иннинээҕи болуоссакка эрэ ыытыллыбат.

Бу өрөбүлгэ Дьокуускай аэропордун үлэһиттэрэ анал тиэхиньикэ көмөтүнэн куорат 30-с №-дээх орто оскуолатын тиэргэниттэн 60 куб. миэтэрэ хаары тиэйдилэр.

Аэропорт бу үөрэх тэрилтэтин кытта шефтэһэр. Бу буоллаҕа  үтүө холобур. 

Ууллара эмиэ кыһалҕа

Бу күннэргэ лаппа сылыйан, ириэрэн, хаарбыт аны ууллан, өссө биир кыһалҕаны үөскэттэ.

Куорат баһылыгын солбуйааччы Владислав Слепцов иһитиннэрбитинэн, муус устар 7 күнүгэр «Жилкомсервис» тэрилтэ 17 ассенизатор массыыната үлэлии тахсыбыт, 2500 куб. миэтэрэттэн тахса хаар уута оборторуллубут.

Маны сэргэ управаларга бэдэрээттиир тэрилтэлэр уонча тиэхиньикэлэрэ кыбаартал иһинээҕи ууну хачайдыыллар. 37 мотопомпа үлэҕэ бэлэм.

! Сайаапкаларгытын Биир кэлим диспетчерскэй сулууспаҕа эрийэн биэриэххитин сөп. Төл.: 444-564.

Эппиэтинэһи ким сүгэрий?

– Атыы-эргиэн кииннэрин, маҕаһыыннар тастарыттан. Урбааны бас билээччилэр.

– Куорат уулуссалара уонна Ленин проспегын тротуардара.

«Якутдорстрой» аахсыйалаах уопсастыба.

– Уокуруктарга уонна куорат таһынааҕы нэһилиэктэргэ (тиэргэн, подъезд, оҕо былаһаакката, элбэх кыбартыыралаах дьиэ хоруобуйата).

Бэдэрээттээх тэрилтэлэр, салайар хампаанньа (УК), дьиэ бас билээччилэрин табаарыстыбалара (ТСЖ).

– Кыбаартал иһинээҕи сирдэргэ.

Муниципальнай дворниктар, бэдэрээтчиттэр.

– Чааһынай сектор.

Бас билээччилэр бэйэлэрин күүстэринэн.

БОЛҔОЙ!

Бу бобуллар:

– Суолга, тырааныспар ааһар сиригэр хаары мунньуу;

– Быраап аакталарыгар ыйыллыбатах сирдэргэ хаары мунньуу, күрдьүк оҥоруу;

– Чааһынай дьиэ тиэргэнигэр хаары мунньуу;

– Газоннарга хаары чөмөхтөөһүн;

– Хаары кытта тутуу матырыйаалын уонна да атын бөҕү быраҕыы.

Хаары дьаһайыы быраабылатын кэһии иһин ыстараап көрүллэр:

– 1000-3000 солк. (чааһынай дьоҥҥо);

– 10 000 - 30 000 солк. (дуоһунастаах сирэйдэргэ);

– 50 000-500 000 юридическай сирэйдэргэ.

Хаартыскалар:
Ааптар түһэриилэрэ уонна Олохтоох дьаһалта телеграм-ханаалыттан