«Булчут» ырыа клибэ ханна уһулунна?

Көрбүт эрэ бары «киинэ курдук кэрэ көстүү» диэн хайҕаата. Чахчы да, булчут барахсан умсугуйа көрөр аар айылҕата, Баай Байанай маанылаах көтөрө-сүүрэрэ, көмүс хатырыктааҕа барыта көстөн, харах хайҕыыр, ордук эр дьону өрүкүтэр хартыына буолбут. Ырыа тэтимэ даҕаны ахсым айаннаах ат курдук өрө көтөҕүллүүлээх.

«Киин куорат» Виталий Очировы кытта кэпсэтэн, клип уһуллубут кэпсээнин кэрэхсээтэ.

– Виталий, өссө биир саҥа ырыа сүрэхтэммитинэн эҕэрдэлиибит! Маннык, ахсым ат айаныныы тэтимнээх ырыаны ким айда-тутта? Биитэр, бэйэҥ дуу?

– Бэйэм ырыам буолбатах. Тылын ааптара Сунтаар Бордоҥуттан төрүттээх Николай Федотов. Билсэ иликпит. Оттон дьүрүлүн биир дойдулааҕым, Уус Таатта киһитэ Валерий Данилов айда-тутта. Валерий бу иннинэ «Үс дьоһун хочо» ырыабын суруйбут буолан, бу «Булчут» ырыатын биэрбитигэр, үөрүүнэн сөбүлэспитим.

– Арааһа, чопчу эйиэхэ анаан айыллыбыт ырыа быһыылаах. Эчи, клипкитин устубут сиргит-уоккут да кыраһыабайа!

– Бэйэм сүүрбүт-көрбүт, оттообут-мастаабыт, оҕо сааһым ааспыт Харбалааҕым үтүө түөлбэтигэр, Төҥүттэ үрэҕин ытык сиригэр 85 саастаах идэлээх булчут Василий Дмитриевич Теряков үүтээнигэр, сиригэр-уотугар устубуппут. Клипмейкер Ион Иванов дьэ маны барытын умсугуйан туран уһулла, фотограф Виктор Лифу хаартыскаҕа хатаата.

– Көстөр кыылы-сүөлү ити тиийэн көрдүгүт дуо?

– Биллэн турар, үүтээҥҥэ кэлэ-бара мас көтөрүн арааһын көрбүппүт. Кыыл-сүөл суола да баһаам этэ. Ол эрээри клипкэ киирбит хамсыыр харамайы Ион бэйэтэ булан-талан киллэрбит.

– Собону дьиктитик буһарынан сиэтигит. Кэбээйилэр эрэ собону тоҥнуу хатырыктаан астыыллар этэ. Ол эрээри кинилэр, төбөтүн быһан, үөстүүр идэлээхтэр. Эһиги бүтэйдии буһардыгыт дии.

– Урут өрүс балыгын тоҥнуу сиэри, собону тоҕо маннык хатырыктаабаттара буолла дии санаар этим. Онтон кэбээйилэр итинник астыылларын билэн, быйыл тыайалар бэрсибит соболорун, дьэ, дьиҥнээх кэбээйилии астаатым уонна биһирээтим. Ууга ириэрэн хатырыктыырдааҕар амтанныын атын буолар эбит. Оттон үөһүн, сорох дьон кыһыҥҥы собо үөһэ суох эбэтэр букатын кыра буолар дииллэрин иһин, ылбатахпыт. Бөдөҥ собоҕо үөстүүр наада буолуо ээ.

– Оннук. Ити көстүү клип эмиэ биир саҥаны арыйыыта дуу, өбүгэ үгэһин сөргүтүүтэ дуу буоллаҕа. Бу үлүгэрдээх үлэни хас күн уһуллугут?

– Икки күн уһуллубут. Бастакы күн Илья Николаевич УАЗ массыынатыгар олорсон сирбитигэр тиийэн, тоҥ үүтээни оттон, наар үүтээн иһэ-таһа уһуллубута. Сарсыныгар Роман Николаевич Табунанов Чычымахтан көтүтэн аҕалбыт Дьөһөгөй оҕолорун миинэн, Амма эбэ устун сиэллэрбиппит. Аспытын-таҥаспытын таайым Николай Николаевич Акимов тэрийэн, үлэбитин чэпчэттэ. Аны туран, Харбалааҕым килбэйэр киинигэр сабыс-саҥа дьиэ туттубут Ольга уонна Иннокентий Бабановтарга хоно-өрүү сыттыбыт. Онон бу ааттаталаабыт дьоммор барыларыгар уонна кинилэри тылыгар киллэрбит убайым Александр Николаевич Акимовка махтал мааныта. Уулаах балык быстыбат, ойуурдаах куобах охтубат, дьонноох киһи тутайбат! Оттон мин, көрөөччүм биһирээтэҕинэ, истээччим сэҥээрдэҕинэ, өссө да айыам-тутуом, үрдүк үрдэллэри дабайыам турдаҕа!