Бу сонуну үгүс киһи күүппүтэ

Бу препарат искэни (злокачественнай саҥа үөскээһиннэри) толору суох оҥорор, быһа барыллаан эттэххэ, бу эмп ыарыһахтары онкологияттан 100% босхолуур кыахтаах.

Чинчийиигэ 11 дойдуттан 102 ыарыһах кыттыбыт. Кинилэр бары эмтэммэт ыарахан туруктаахтарын таһынан, хас биирдиилэрин историятыгар рецидивтэр уонна метастазалар бааллар эбит. Пациеннар үгүстэригэр моой уонна сирэй искэннэрэ бааллара. Химиотерапия уонна иммунотерапия кэнниттэн кинилэр организмнара эмкэ хоруйдаабат буолбут, диэн The Guardian иһитиннэрэр.

Онтон саҥа препаратынан эмтээһин кэнниттэн 43 кыттааччыга үтүө хамсааһыны бэлиэтээбиттэр. Кинилэртэн 28-гар искэннэрэ улаханнык кыччаабыт, онтон 15-гэр олох да сүтэн хаалбыт. Бу эмп хас да нэдиэлэ иһигэр дьайбыта бэлиэтэммит.

Чинчийээччилэр бэлиэтииллэринэн, эмп тыҥа искэнигэр эмиэ ити курдук дьайыылаах. Лондоннааҕы искэни чинчийэр институт (ICR) уонна Марсден королевскай балыыһатын профессора Кевин Харрингтон организм маннык хоруйун урут хаһан да буолбатах түбэлтэнэн ааттаата.

«Химиотерапияҕа да, иммунотерапияҕа да бэриммэт буолбут ыарыһахтарга маннык күүстээх хоруй урут хаһан да суоҕа. Эмтиир кыах олус аҕыйах буолан, бу бөлөххө киирэр дьоҥҥо маннык туһаны аҕалыы сөхтөрөр», — диэн учуонай эттэ.

Кини бу эмтээһин сыл аайы тыһыынчанан ыарыһахха туһаны аҕалыа диэн эрэнэр.

«Өйдөөх» укуол искэни утары үс ньыманан үлэлиир. Ол курдук, искэн улаатыытыгар көмөлөһөр EGFR (эпидермальнай үүнүү факторын рецептора) уонна искэн килиэккэлэрэ эмтэнииттэн куотуналларыгар үгүстүк туттар MET суолларын бүөлүүр. Ону таһынан, быһыы иммуннай систиэмэ искэни утары охсуһарыгар көмөлөһөр.

Искэни утары препараты Johnson & Johnson корпорациятын учуонайдара айбыттар. Чинчийии сиһилии түмүктэрэ Чикаго куоракка буолар сыллааҕы Америка клиническэй онкология уопсастыбатын (ASCO) кэмпириэнсийэтигэр көрдөрүллүөхтэрэ.

Бу туһунан РБК суруйар.