Босхо сир учаастактарын түҥэтии хаамыыта хайдаҕый?

Учаастактар Тулагыга уонна Табаҕаҕа саадынан дьарыктанарга бэрилиннилэр.

Сэрэбиэй быһыытынан 55 киһиэхэ Табаҕаҕа сир тигистэ, 40 киһи Тулагы Киллэмҥэ ылла. Бэлиэтээн эттэххэ, сэрэбиэйгэ бу сырыыга 2024 сыл ыам ыйын 24 күнүгэр диэри учуокка турбуттар кытыннылар.

Бүгүҥҥү күҥҥэ анал байыаннай дьайыы кыттыылаахтарыгар уопсайынан 770 сир учаастага тыырылынна: Табаҕаҕа – 294, Тулагы Киллэмҥэ – 476.

Сир сыһыаннаһыыларыгар агентство иһитиннэрэринэн, анал байыаннай дьайыы кыттыылаахтарыгар сир учаастагын боппуруоһунан сиһилии билсэргэ: Дьокуускай к., Октябрьскай уул., 20/1, 311 каб., хас сэрэдэ аайы 14.00-17.00 чч.

Оттон СӨ баайга-дуолга уонна сир сыһыаннаһыыларыгар миниистирэ Павел Багынанов «Диалог в властью» биэриигэ иһитиннэрбитинэн, өрөспүүбүлүкэ үрдүнэн анал байыаннай дьайыы  кыттыылаахтарыгар уопсайа 651 сир учаастага, ол иһигэр бойобуой дьайыылар бэтэрээннэригэр 572 учаастак бэриллибит.

«Маннык быраабынан анал байыаннай дьайыы кыттыылаахтарын 18 саастарын туола илик уонна 18 саастарын ааспыт оҕолоро өскөтүн кинилэр 18-гар диэри инбэлиитинэн билиниллибит буоллахтарына туһаналлар. Маны сэргэ анал байыаннай дьайыы кыттыылаахтара күнүскү үөрэххэ үөрэнэр оҕолоро сир учаастагар сайабылыанньа биэрэр кэмҥэ 25 саастарын туола илик буоллахтарына», – диэн быһаарар Павел Багынанов.

Сир учаастага Саха сиригэр элбэх оҕолоохторго эмиэ босхо бэриллэр. Бүгүҥҥү күҥҥэ өрөспүүбүлүкэ 14 тыһыынчаттан тахса элбэх оҕолоох ыала бу быраабынан туһанна.

Чуолаан, алтынньы ый саҥатынааҕы чахчынан, 14 453 устуука, ол иһигэр быйыл 1456 босхо сир учаастага бэриллибит.

Миниистир иһитиннэрбитинэн, бүгүҥҥү күҥҥэ босхо сир учаастагар сайабыалыанньа биэрбит 3 уонна онтон элбэх оҕолоох ыал ахсаана 34 043 тиийэн турар. Уһук Илин демографическай политикатын концепциятын олоххо киллэриинэн 2025 сылга диэри сыллата 400-түү учаастак бэриллиэхтээх.

Бу үлэ билигин дойду баһылыга Владимир Путин көҕүлээһининэн олоххо киирэр «Дьиэ кэргэн» нацбырайыак иитинэн ыытыллар, диэн Ил Дархан уонна Бырабыыталыстыба пресс-сулууспата иһитиннэрэр.

Хаартыска: СИА