Босхо сир учаастагын оннугар бэриллэр харчы 100 тыһ. солк. үрдүөн сөп

Элбэх оҕолоохторго бэриллэр босхо сир учаастагын оннугар олохтоммут харчынан төлөбүр кээмэйэ 100 тыһ. солк. үрдээн,  300 тыһ. солк. тэҥнэһиэн сөп, диэн официальнай телеграм-ханааллар суруйаллар.

Санатар буоллахха, элбэх оҕолоохторго бэриллэр сир учаастагын оннугар 200 тыһ. солк. кээмэйдээх биир кэмнээх харчынан төлөбүр СӨ Бырабыыталыстыбатын уурааҕынан 2023 сылтан олохтоммута. Сокуон күүһүгэр киириэҕиттэн өйөбүл бу ньыматынан Дьокуускай куоракка 753 ыал туһаммыт. 
Дьокуускай куорат Олохтоох дьаһалтатын 2024 сыл түмүгүнэн отчуоттарыгар этиллэр чахчыларынан, 2023 сылтан куорат нэһилиэнньэтин ахсаана 5000 кэриҥэ киһинэн эбиллибит (2023 с. – 384 979, 2024 с. – 389 258)., оттон 2019 сылтан уопсайа 49 594 киһинэн, ол эбэтэр 14,6% элбээбиппит. Манна нэһилиэнньэбит орто сааһа 35, ол эбэтэр оҕо-уруу тэнитэр саас буоларын бэлиэтиир эмиэ тоҕоостоох. Ол да быһыытынан Уһук Илиҥҥэ оҕо төрөөһүнүгэр бастакы миэстэҕэ турабыт. 
Онон, сир учаастагын барыларыгар кэмигэр биэрии тэтимэ баҕарбыт курдук сыыдам буолбатаҕын, уочарат санаа хоту сыҕарыйан иһиэхтээҕэр, сылы-сылынан хамсаабакка кэриэтэ турарын тустаахтар үчүгэйдик билэллэр. Онон 2023 сылтан элбэх оҕолоохторго талар быраап үөскээбитэ – уочараты күүтэн сир учаастагын ылаллар дуу, харчынан компенсацияны талаллар дуу. 
Сокуон бу төлөбүрү дьиэ-уот усулуобуйатын тупсарыыга, ол иһигэр кирэдьиит, ипотека бастакы усунуоһугар туһаҕа таһаарары ирдиир.