Боростуой гражданин туалет көрдүө, тоҕо суоҕун ыйыталаһыа суохтаах дуо?

Тамара Винокурова, куорат олохтооҕо:

– Биир күн анаан-минээн атыы-эргиэн кииннэрин кэрийдим. Атыылаһааччыларга туалет баарын-суоҕун бэрэбиэркэлээтим.

Бастакы сылдьыбыт сирим – Петр Алексеев уул. турар «Алмаз» атыы-эргиэн киинэ. Килэйэн-халайан, көстүүтэ кэрэтэ сүрдээх, киһи хараҕа халтарыйыах айылаах. Ол эрээри боростуой атыылаһааччы тахсан киирэр усулуобуйата суох буолан хомотто. Администраторы ыҥыртарбыппар, «Үлэлээбитим бастакы күнэ», – диэн баран куотан хаалла. Охрана этэринэн, бомжтар киирэн киртитэллэр, ол иһин үлэһиттэр эрэ сылдьаллар. Иккис этээскэ турар атыыһыт дьахтар дьон наһаа эрэйдэнэллэр, туалет көрдөөн ыйыталлар диэн кэпсээтэ. Ити гынан муоста сууйар үлэһиттэн улахан көҥүл ылан, били сирбэр киирэ сырыттым. Хаһан тахсарбын манаан турда.

Салгыы мантан чугас Петр Алексеев уул., 62,  «Бургер Хит» киирэ сырыттым. Туалет үлэлээбэккэ турар. Ону быстах кэмҥэ уу арахсан турар диэн быһаардылар. 

Үһүс сирим – «Хозмаркет». Туалет суох. Администратортан ыйыттым. Онуоха: «У нас не торговый центр, а магазин», – диэн куотунна. Чахчы, оннук дуо? Туох уратылаахтарый? Ким ону быһаарыай? Онуоха уочаракка турар атыылаһааччылар күө-дьаа буоллулар. Туалет суоҕа – куоракка наһаа улахан кыһалҕа, ордук биэнсийэлээхтэр, кыра оҕолоох ийэлэр эрэйдэнэбит дии түстүлэр.

Салгыы «Олимп» кииҥҥэ тиийдим. Манна үгүстүк сылдьабын, дьоҕус да буоллар, туалеттаах, мэлдьи үлэлии турар буолар.

Үлэһиттэр киҥир-хаҥыр саҥаралларыттан, «Эн кимҥиний, дьону кытта кэпсэтэргэ ким көҥүл биэрбитэй?» дииллэриттэн ордук абардым. Уопсастыбаннай кэрэспэдьиэммин диэбиппэр, дастабырыанньаҕын көрдөр дииллэр. Ол аата боростуой гражданин туалет көрдүө, тоҕо суоҕун ыйыталаһыа суохтаах дуо?