«Борисовка-1» сылааһа да, итии уута да суох сайылаата. Саҥа былаас тугу быһаарда?

Куорат биир кэрэ-мааны айылҕалаах миэстэтигэр ааспыт үйэ 90-с сылларыгар канадскай технологиянан 61 иккилии этээстээх, аҕыстыы кыбартыыралаах «куукула» дьиэлэрэ тутуллубуттара. Бэйэтэ куухуналаах, оһохтоох, автономнай гаас хочуоллаах, билиҥҥи АДПИ курдук баһаары сэрэтэр тэриллээх, ковролин муосталаах, толору хааччыллыылаах дьоҕус дьиэлэр оччолорго, кырдьык да, куукула дьиэтин курдук тып-тап этилэр. Олохтоохтор ордук ититэр ситимнэрин хайҕыыллара, хаһан баҕар сылааһы улаатыннарыахха да, аччатыахха да сөбө.

Ол бэйэлэрэ кэлиҥҥи сылларга бииртэн биир кытаанах кыстыктары туорууллар. Быйыл сайын букатын даҕаны гаас хочуолларын араараннар, итии уута да, сылааһа да суох олордулар. Дьолго, куйаас сайын буолан быыһаннылар. Оттон «Восхождение» салайар хампаанньалара биирдии кыбартыыраттан саҥа гаас хочуолу атыылаһарга сүүрбэлии тыһыынчаны хомуйары ирдээбитин онто да суох кыра дохуоттаах дьон ыараханнык ылыммыттара.

Түөлбэ уопсастабанньыктара «Киин куоракка» иһитиннэрбиттэринэн, дьиэлэр гаас хочуолларын тэхиньиичэскэй туруктарын бэрэбиэркэ көрдөрбүтүнэн, хомойуох иһин, 59 хочуол бары (биирдии куорпуһу биир хочуол сылытар, 61 куорпустан 2-тэ дьон олорбот буолан турар) диагностиканы ааспатахтар. Олохтоохтор манна бастатан туран салайар хмпаанньаны буруйдууллар. Аҥаардас быйыл кыһын тоҕус төгүл араас, ол иһигэр биир түгэҥҥэ углекислай гаастан дьон эчэйиилээх саахал тахсыбыта.

Саҥа былаас тугу быһаарда?

Баһылыгы бастакы солбуйааччынан анаммыт Андрей Лебедев салайааччылаах, Сайсары уокуругун управатын салайааччыта Петр Тастыгин, Олох-дьаһах, хомунаалынай хаһаайыстыба уонна энергетикэ департаменын саҥа салайааччыта Саргылана Степанова, гаас сулууспатын, салайар хампаанньа бэрэстэбиитэллэрэ кыттыылаах көһө сылдьар мунньах кыһалҕаны көрсүбүт дьону уоскутар бастакы дьоһун быһаарыыны ылынна.

Ол курдук, бастатан туран, 13 саахалланар туруктааҕынан билиниллибит дьиэҕэ анаан гаас оһоҕун оҥорор собуокка сайаапка ыытыллыбыт. Салгыы атын куорпустар олохтоохторун кытта үлэ ыытыллар. Сокуон быһыытынан, хочуолу уларытыы ороскуотун дьиэни бас билээччи сүгэр. Ол эбэтэр олохтоохтор бэйэлэрэ уйуналлар. Сорох дьиэлэр хочуолларын быстах өрөмүөн эрэ күүтэр.

Бэлиэтээн эттэххэ, өссө б.дь. бэс ыйын 19 күнүгэр «Борисовка-1» олохтоохторо үөскээбит балаһыанньанан дойду баһылыга Владимир Путин уонна РФ Силиэстийэлиир кэмитиэтин салайааччыта Александр Бастрыкин ааттарыгар сурук бэлэмнээбиттэрин туһунан иһитиннэрэн тураллар. Онно салайар хампаанньа саҥа хочуоллары уларытарга олохтоохтортон уу харчынан, туох да акт толоруута, мунньах ыытыыта суох харчы хомуйарынан бэрэбиэркэни ыытар туһунан этиллибит.

Саҥа былаас маны сэргэ саахалы сэрэтэр устройстволары туруорар наадатын ыйбыт.

Онон, «Борисовка-1» түөлбэҕэ быйылгы оттук сезонун баттаһа хочуоллар саҥардыллан, өрөмүөннэнэн, сылаас даҕаны, итии уу даҕаны кэмигэр бэриллиэхтээх.