Борисовка-1 көһөрүллүөн сөп. Хаһан?

Ол курдук, олохтоохтор көһөрүү боппуруоһун туруорсубуттара ыраатта. Бу боппуруос саҥа анаммыт баһылык Дмитрий Садовниковка эмиэ көтөҕүлүннэ. Холобур, Территориялары кэлимник сайыннарыы (КРТ) былааныгар киллэриллэри күүтэллэр. Билигин Дьокуускайга 2017 сыл тохсунньу 1 күнүгэр диэри хаарбаҕынан билиниллибит дьиэлэри көтүрүү болҕомтоҕо ылыллар. Оттон хаарбаҕынан уонна саахалланар туруктааҕынан официальнайдык билиниллибит дьиэ ахсаана Дьокуускай куоракка 800-тэн тахса. Борисовка-1 түөлбэ онно хапсыбат.

Манна даҕатан, бу саас ыам ыйыгар Куорат дууматыгар буолан ааспыт Баайга-дуолга уонна сир сыһыаннаһыыларыгар сис кэмитиэт мунньаҕар Дьокуускай куоракка территорияларын кэлимник сайыннарыыга (КРТ) бүгүҥҥү күҥҥэ 13 бырайыак үлэлиирэ бэлиэтэммитэ. Куораты тутууга уонна архитектураҕа департамент салайааччыта Иван Гуляев бу мунньахха эбии үс маастар-былааны оҥорор сорук турарын иһитиннэрбитэ: 204-с уонна 211-с кыбартааллар сорох чаастара, Владимировка, Табаҕа уонна Эргэ Табаҕа территориялара уонна Марха Газовиктар уонна Кирзавод оройуоннара. Салгыы 111-с, 112-с, 75-с, 84-с, 167-с, 171-с, 11-с, 68-с кыбартааллар дьон олорор түөлбэлэрин, Крестьянскай ырыынак дьон олорор дьиэтэ суох эҥэрин, 86-с, 93-с кыбартааллар территорияларын кэлимник сайыннарыы былаана оҥоһуллара күүтүллэр. Борисовка-1 манна эмиэ суох.

Онон, Борисовка-1 түөлбэ көһөрүллэрэ КРТ былааныгар хаһан киирэриттэн тутуктаах.