«Борисовка-1»: хочуоллары ким атыылаһыахтааҕый?

«Киин куорат» ааспыт нэдиэлэҕэ «Борисовка-1» сылааһа да, итии уута да суох сайылаата. Саҥа былаас тугу быһаарда?» диэн матырыйаалыгар быйылгы оттук сезонун баттаһа хочуоллар саҥардыллан, өрөмүөннэнэн, сылаас даҕаны, итии уу даҕаны кэмигэр бэриллиэхтээх диэн суруйан турар.

Ол курдук, бэрэбиэркэ көрдөбүтүнэн, 59 дьиэттэн 15-һин хочуола сөргүтүллүбэт гына алдьаммыт, бу Арассыыйаҕа аны атыыламмат, саппаас чааһа даҕаны суох Beretta мааркалаах оһохтор.

Оттон сокуон быһыытынан, дьиэ иһинээҕи гаас хочуолун бүддьүөт үбүлүүр кыаҕа суох, тоҕо диэтэххэ чааһынай бас билиигэ киирсэр. Онон саҥаны атыылаһыы, саппаас чааһын да саҥардыы дьиэни бас билээччи эбэтэр Салайар хампаанньа сүгэр ороскуоттара. Бүгүҥҥү күҥҥэ алта дьиэ олохтоохторо бэйэлэрэ түмсэн, харчы хомуйан, «Лемакс» фирма хочуоллары атыылаһан туруортарбыттар. 9 дьиэҕэ бу боппуруос сорох кыбартыыралар хаһаайыттара төлөбүрү оҥорортон аккаастаналларыттан быһаарыллыбакка турар.

Мэр санаата биир – оттук сезона саҕаланыан иннинэ боппуруос быһаарыллыахтаах.

Дмитрий Садовников: «Олохтоохтору кытта нэдиэлэ аайы көрсөбүт. Дьиэни бас билээччилэр бары сөбүлэһэр быһаарыыларын ылыныахпытыгар диэри ол салҕаныаҕа. Оттук сезона саҕаланыар диэри быһаарыллыан наада».

Дьокуускайга уопсайа 121 элбэх кыбартыыралаах дьиэ (2845 кыбартыыра) гаас хочуолугар техдиагностика ыытыллыахтаах, ол иһигэр Борисовка-1 түөлбэҕэ. Маннык диагностика нэһилиэнньэ олоҕун харыстыыр, иэдээни сэрэтэр сыалтан ыытыллар.