Борис Сдвижков сүрүн бирииһин тутта!

«Дыгын-2025» Оонньууларга күрэс сэттэ көрүҥэр утарсааччыларын баһыйталаабыт, хайҕал үрдүкү үктэлигэр турары ситиспит Амма Чапчылҕанын чаҕылхай ыччата Борис Сдвижковка сүрүн бирииһин туттарыы үөрүүлээх дьоро түгэнэ Хатас бөһүөлэгин «Тускул» Култуура киинигэр буолбута.

Спорду сэҥээрээччилэринэн туолбут саалаҕа Саха Өрөспүүбүлүкэтин спорка миниистирэ Леонид Спиридонов, Дьокуускай куорат дьаһалтатын баһылыга Евгений Григорьев, көҥүл тустууга Олимпийскай оонньуулар чөмпүйүөнэ Павел Пинигин, Хатас бөһүөлэгин баһылыга Евгений Пермяков, Чурапчытааҕы физкултуура уонна спорт институтун ректора Иннокентий Готовцев, Дьокуускай куорат физическэй култуураҕа уонна спорка управлениетын начаалынньыга Эдуард Ефимов итии-истиҥ эҕэрдэлэрэ дуораһыйда.

Сыралаһан-сыралаһан, көлөһүнүн тоҕон ылбыт сүрүн бирииһин – 3 000 000 солкуобай толору угуллубут холбуканы Борис Сдвижковка «Дыгын оонньууларын» сүрүн спонсора, «Прогресс» тутуу тэрилтэтин генеральнай дириэктэрэ Алексей Семенович Пинигин туттарда:

– Туох айылаах элбэх харчытай диэн дьон соһуйара оруннаах. Спонсор итинтэн кыраны туттарыа суохтааҕын туһунан усулуобуйа баар. Саха дэгит күрэһин көрүҥэ оҕо-ыччат эт-хаан, өй-санаа өттүнэн, үлэһит киһи буола үүнэригэр төһүү күүс буолар. Мин маннык күрэҕи тэрийэр куораппыт мэриятыгар, баһылык Евгений Николаевич Григорьевка, спорт управлениетыгар Эдуард Васильевич Ефимовка, өрөспүүбүлүкэбит Аҕа баһылыга Айсен Сергеевич Николаевка, бырабыыталыстыбаҕа, спорт миниистирэ Леонид Николаевич Спиридоновка махтанабын. Кинилэр биһиги оҕолорбут үүнэн-сайдан тахсалларыгар кыахтары үөскэтэллэр. Күрэсчиттэр дойдубут дьиҥнээх патриоттара, эт-хаан өттүнэн сайдаллар, өйдөрө-санаалара ситэр-хотор, дойдубутун көмүскүүр, харыстыыр дьон буола уһаарыллаллар. Инники өттүгэр «Дыгын оонньуулара» сайда турарыгар саарбахтаабаппын. Үчүгэй, кыахтаах уолаттар элбээн иһэллэриттэн үөрэбин!

Борис Сдвижков:

– Барыта киинэҕэ курдук үчүгэйдик ааста, туруоруллубут сорук туолла. Маннык буолуохтаах диэммин эрдэттэн кэтэһэр этим. Күүскэ үлэлээтим, дьарыктанным. Ол баҕа санаам туолбутуттан үөрүүм улахан. Үчүгэй дьону кытта алтыһаммын, барыта табыллан истэ. Доруобуйам төһө уйарынан салгыы киирсэр санаалаахпын. Сааһым 28-һым. Саха киһитэ 35-гэр диэри сайдыан сөп дииллэр. Онон өссө хас да сыл баар. Ыччаттарга туһаайаммын этиэм этэ – туруоруммут  сыалы-соругу толорорго күүстээх баҕа санаа, онуоха сөптөөх өйдөөх исписэлиистэр наадалар. Урут соҕотоҕун  дьарыктанаммын эчэйиилэри ылаттыыр этим. Тренердэр барытын ыйан-кэрдэн биэрэллэр. Кинилэр этиилэриттэн туораабакка эрчиллии элбэҕи быһаарар. Үс сыл сүүрүк-быһый  Дмитрий Дмитриевич Наумов, мас тардыһыыга Айсен Григорьевич Атастыыров, кыра эрдэхпиттэн тустууга Кирилл Иннокентьевич Павлов, оскуолаҕа физкултуурам учууталлара Наталья Романовна Алексеева, Игорь Егорович, «тутум эргииргэ» Николаев, мас тардыһыытыгар  Афанасий Афанасьевич Владимиров, Андрей Анатольевич Барашков, устудьуоннуур  сылларбар Александр Александрович Захаров, Михаил Ильич Борохин, Егор Петрович Кудрин курдук элбэх тренери кытта үлэлэстим. Ох сааҕа Александр Михайлович Филатов, хапсаҕайга Александр Гермогенов көмөлөстүлэр. Барыларыгар махтанабын.

Хатас дьоно-сэргэтэ анаан-минээн бэлэмнэнэн, сиэр-туом  ыытаннар, наһаа сылаастык, истиҥник көрүстүлэр. Кынаттыыр тыл бөҕө этилиннэ, алгыстанным. Манныгы күүппэтэҕим. Махталбын, эҕэрдэбин аныыбын! Эһиил өссө эппиэтинэстээх сыл. Күүстээх дьарык күүтэр.

«Дыгын оонньууларын» муҥутуур кыайыылаахтарын чиэстээһин «Прогресс» тутуу тэрилтэтэ базаланан турар Хатас бөһүөлэгэр быйыл алтыс төгүлүн ыытылынна. Эһиил баччаларга кус-быһый, ат-бөҕө уоланнар дэгит күрэстэригэр ким сүрүн бириис хаһаайына буолуоҕай? Дьоро түгэҥҥэ көрсүөххэ диэри!