Больничнайы саптарарга MAX туһалыыр

Саҥа сыһыарыыны дьон төһө да уруйдуу-айхаллыы көрсүбэтэр, син балай эмэ хачайданар, туһанар буолбуттарын күннээҕи олох көрдөрөр. Ону өрөспүүбүлүкэ үрдүнэн больничнайы саптарарга МАХ сыһыарыы туһалыыр буолуоҕуттан хайыы үйэ 14,5 тыһ. тахса больничнай сабыллыбыта да кэрэһилиир.

Истэ илик дьоҥҥо этэр буоллахха, больничнайы саптарары таһынан быраастарга эмиэ МАХ көмөтүнэн суруйтарыахха сөп.  

Холобур, ыарыһах үтүөрдүм диир түгэнигэр бырааска көрдөрүнэ кэлэ сатаабакка, ыраахтан олорон эрэ, теле-мэдиссиинэни туһанан, бырааска сүбэлэтии, быһаартарыы кэнниттэн больничнайын саптарыан сөп. Бу, биллэн турар, пациеҥҥа, эмчиккэ  да табыгастаах. Ону тэҥэ балыыһаҕа көрдөрүнүү уочарата да аҕыйыыра эрэбил.

Бырабыыталыстыба пресс-сулууспата  иһитиннэрэринэн, СӨ Доруобуйа харыстабылын миниистирэ Лена Афанасьева: «Сыыппара аныгы технологияларын олоххо киллэрии – өрөспүүбүлүкэ олохтоохторо мэдиссиинэ көмөтүнэн холкутук туһанар кыахтарын улаатыннарар. Теле-мэдиссиинэ сүбэтин уонна MAX национальнай мессенджери туһаныы быраас уонна ыарыһах алтыһыыларын табыгастаах оҥорор. Ону тэҥэ мэдиссиинэ көмөтүн суһаллык оҥорор кыаҕы улаатыннарар», – диэн бэлиэтиир.

Оттон ыалдьа сылдьыбыттар үтүөрэн баран, хаттаан поликлиникаҕа бара сатаан, күнү-дьылы бараабаттара, наадаларын төлөпүөн нөҥүө кэбэҕэстик быһааттаран, больничнайдарын саптараллара – туһугар үөрүү.

Доруобуйа харыстабылын эйгэтигэр сыыппара өҥөлөрүн туһаныы тупсуутугар, олоххо киириитигэр “Уһун уонна көхтөөх олох” диэн дойду биир төһүү суолталаах национальнай бырайыага уонна Ил Дархан анал Ыйааҕа төһүү буолар.

Аах, туһан: Бырааска суруйтарарга уонна үтүөрдэххэ больничнайы саптарарга МАХ сыһыарыы абыраллаах чат-ботун  сигэтэ: https://max.ru/zapismzsakha_bot.