Болҕой: Үрдүк үөрэххэ туттарсыыга уларыйыы баар

Тус сыаллаах үөрэтии квотата

Биир уларыйыы тус сыаллаах (целевой) үөрэтии квотатыгар сыһыаннаах. Бакалавриакка уонна специалитекка төлөбүрдээх миэстэ муҥутуур элбэх ахсаанын РФ үөрэх министиэристибэтэ олохтуур. Үрдүк үөрэх кыһалара кэмиэрчэскэй миэстэни баҕарбыттарынан элбэтэр бырааптара суох. Ол эрээри быйыл магистратура бырагырааматыгар төлөбүрдээх миэстэҕэ хааччах суох. Гарант.ру суруйарынан, мантан инньэ тус сыаллаах миэстэлэр биир чопчу сакаасчыкка сыһыарыллар буолуохтара. Онно хайаан да үөрэнии көрүҥэ уонна үөрэх бырагыраамата ыйыллыаҕа. Ардыгар сакаасчыт этиитэ (наадыйар миэстэтэ) туһааннаах үөрэх хонтуруолланар сыыппаратын иһинэн көрүллэр квотаттан аҕыйах буолуон сөп. Оннук түгэҥҥэ үөрэх кыһата тус сыаллаах миэстэни бакалавриат уонна специалитет бырагыраамаларыгар – атын, туһунан квотаҕа көһөрөн биэриэн сөп буолла.  Оттон магистратура бырагырааматыгар – бүддьүөт сүрүн миэстэлэригэр көһөрөр кыах бэриллэр.

Колледж кэнниттэн туттарсааччыга

Иккис уларыйыы коллеһы бүтэрэн баран, салгыы үрдүк үөрэххэ туттарсааччыларга сыһыаннаах. Орто үөрэххэ ылбыт идэтэ үрдүк үөрэххэ туттарсар хайысхатыгар сөп түбэһэр буоллаҕына, БКЭ туттара сатаабакка, үрдүк үөрэх кыһата тутар эксээмэннэрин этэҥҥэ туттарда да,  холкутук үрдэтиниэн сөп.

Онуоха үрдүк үөрэх кыһата орто үөрэх кэнниттэн туттарсааччыларга анаан ыытар тургутан көрүүтүн, эксээмэнин хайдах көрүҥүнэн ыытарын уонна эксээмэн ахсаанын бэйэтэ быһаарар. Арай ахсаана 4-тэн элбиэ суохтаах уонна нуучча тылын эксээмэнэ булгуччу баар буолуохтаах диэн ирдэбил баар.

Дьэ, оттон орто үөрэх кыһатыгар ылбыт идэтиттэн атын идэҕэ (специальноска) туттарсар буоллахтарына, быйылгыттан саҕалаан, атын абитуриеннары кытта тэҥ усулуобуйаҕа, куонкурустаһар буолбуттар.

Докумуону туттарыы  

Үсүһүнэн, үрдүк үөрэх кыһаларыгар докумуону туттарыыга эмиэ кыра уларыйыы баар. Быйылгыттан саҕалаан, докумуоннары Судаарыстыбаннай өҥө порталын нөҥүө, үрдүк үөрэх кыһатыгар эбэтэр салаа тэрилтэтигэр сирэй тиийэн эбэтэр “Арассыыйа почтатын” өҥөтүн туһанан эрэ ыытыахха сөп буолар. Урукку курдук үөрэх кыһатын информационнай тиһигин (саайт, тус кэбиниэт) нөҥүө ыытыы тохтуур.

Физика эксээмэнин ирдээччи элбиэ

Быйылгыттан саҕалаан, баһыйар үгүс инженернэй, техническэй уонна айылҕа-наука идэлэригэр үөрэтэр кыһаларга туттарсааччыларга физика эксээмэнэ булгуччулаах буолуоҕа. Бу  иннинэ физиканы профильнай матымаатыканан эбэтэр информатиканан солбуйаллара. Быйылгыттан ол тохтуур, физика эксээмэнэ ирдэнэр идэлэрэ элбиирэ сабаҕаланар.

Обществоведение ирдэниитэ аҕыйыыр?

Кэккэ хайысхаларга  обществоведение эксээмэнэ үөрэххэ туттарсыыга соҕотох  булгуччулаах тургутан көрүү (испытание) тэҥэ буолара тохтуур. Ол оннугар үөрэх туһааннаах (профильнай) биридимиэтигэр эксээмэн туттарар ирдэбил туруо. Үгүс түгэҥҥэ история биридимиэтэ эмиэ, син эмиэ нуучча тылын уонна атын бигэргэммит биридимиэттэр курдук, булгуччулаах буолара күүтүллэр.

Быһата, эдэр киһи инженер идэтигэр туттарсарга суоттанар түгэнигэр, билиҥҥиттэн физикатыгар кыһаллыан наада. Гуманитарнай үөрэхтэри сэргээччилэр  үөрэх кыһатын ирдэбилин билиҥҥиттэн киирэн билсиҥ. Уруккулуу обществознаниены талбыккыт, история эксээмэнин туттараргыт наада буолуон сөп. Аны, БКЭ-ҕэ ким ханнык биридимиэти таларын бэлиэр быһаарынан сылдьар ини? Киин бэчээт суруйарынан, БКЭ-2026 туттарсарга сайабылыанньаны бу олунньу 2 күнүнэн тутан бүтэллэр.

Мантан атын өссө туох уларыйыы баарын РФ Үөрэх министиэристибэтин  былырыыҥҥы 904 нүөмэрдээх бирикээһин булан билсиэххэ сөп.