Бокуонньук харчытын айбардаабыттар...

Мэҥэ Хаҥалас улууһугар полиция үлэһиттэрэ өлбүт киһи кирэдьиит каартатыттан уоруу тахсыбытын арыйдылар. Бу туһунан Саха Өрөспүүбүлүкэтин Ис дьыалаҕа министиэристибэтин пресс-сулууспата иһитиннэрдэ.

Полиция отделыгар баантан иһитиннэрии тиийбит. Биир килийиэн 100 тыһыынча солкуобайы биирдэ устубута куттал суох буолуутун сулууспатын үлэһиттэрин болҕомтолорун тардыбыт.

Бэрэбиэркэ түмүгэр харчы өлбүт биэнсийэлээх киһи счетуттан уоруллубута биллибит. Холуобунай ирдэбил үлэһиттэрэ уорбаланааччылар кимнээхтэрин быһаарбыттар: бокуонньук аймахтара – 40 уонна 42 саастаах эр дьон, биирдэстэрэ урут сууттана сылдьыбыт эбит.

Аймах ааттаах дьон, бокуонньугу тиһэх суолугар атаарыыны тэрийсэ сылдьан,  төлөпүөнүн уонна баан каартатын булан ылан уктубуттар. Итиэннэ баан мобильнай сыһыарыытын туһанан, бэйэлэрин тус счеттарыгар 50-нуу тыһыынча солкуобайы көһөрбүттэр. Килийиэн өлбүтүн туһунан сибидиэнньэ бааҥҥа өссө тиийэ илигин өйдөөн, эр дьон уорбут харчыларын уста охсубуттар уонна тус наадаларыгар туттубуттар.

Уорбаланааччылар бу быһыылара биллибэккэ-көстүбэккэ хаалыа, оттон кирэдьиит эбэһээтэлистибэлэрин толоруу атын аймахтарыгар сүктэриллиэ диэн эрэммиттэр.

Бу түбэлтэнэн РФ ХК 158 ыст. 3 ч. («Уоруу») холуобунай дьыала көбүтүлүннэ. Ол аата сирэйэ-хараҕа суох «аймахтар» алта сылга диэри көҥүллэрэ быһыллыан сөп.