Бочуоттаах настаабынньыктары кулун тутар 2 күнүгэр чиэстиэхтэрэ

2025 сыл биир сонун дьаһалынан үлэ кэлэктииптэрин көҕүлээһининэн «Саха Өрөспүүбүлүкэтин Бочуоттаах настаабынньыга» бэлиэ олохтоммута буолар.

Ил Дархан Ил Түмэҥҥэ Туһулааһыныгар бэлиэтээбитинэн, бу наҕараада кэлэр 2026 сылтан кулун тутар 2 күнүгэр – дойду баһылыга олохтообут Настаабынньык күнүгэр туттарыллар буолуоҕа.

Айсен Николаев үлэ, үлэһит киһи суолтатын, аатын үрдэтиигэ өрөспүүбүлүкэ салгыы үлэлэһэрин бэлиэтээн туран, бүгүҥҥү күҥҥэ Саха сирин 115 тыһыынча олохтооҕо Арассыыйа уонна Саха Өрөспүүбүлүкэтин үлэтин бэтэрээнэ буоларын, маныаха 2026 сылга 4 млрд солк. тыырылларын иһитиннэрдэ.

Саха сиригэр үлэһит дьону өрө тутуу быһыытынан 2023 сыллаахха үлэ кэлэктииптэрин көҕүлээһиннэринэн Үлэ, Саас, Маай бырааһынньыгынан ыам ыйын 1 күнүгэр «Үлэ киһитэ» бириэмийэ олохтонон турар. Бу бириэмийэ олохтонуоҕуттан 150 киһи 300 тыһ. солкуобайынан наҕараадаламмыт, диэн Ил Дархан уонна Бырабыыталыстыба пресс-сулууспата иһитиннэрэр.