“Бизнес-Экспо-2026” быыстапканы кэлэн көрүҥ

Манна Саха сирин 15 оройуонуттан 70 олохтоох табаары оҥорооччулар кытталлар.

Тэрээһин “Биисинэс эрэгийиэнэ. Үүнэр-сайдар кэм” өрөспүүбүлүкэ урбаанньыттарын форумун чэрчитинэн ыытыллар. Урбаанньыттары “Көдьүүстээх уонна күрэстэһиилээх экэниэмикэ” диэн национальнай бырайыак өйүүр.

Быыстапкаҕа табаар араас эгэлгэтин, аһыыр аспытыттан саҕалаан, кэтэр таҥаспытыгар, туттар тэрилгэ, симэххэ, киэргэлгэ, сувенирга тиийэ аҕалбыттар.

Манна даҕатан эттэххэ, өрөспүүбүлүкэ үрдүнэн уопсайа холбоон-илбээн 45 890 аччыгый уонна орто урбаан субъега баар. Кэнники биэс сылга урбаанньыттар ахсааннара 21,6% эбиллибит диэн буолар. Аччыгый уонна орто урбаан эйгэтигэр (МСП) 137 тыһ. киһи үлэлэөэр. Бэйэ дьарыктаах дьон ахсаана 80,2 тыһ. тиийбит.

Саха сирин урбаанньыттара эргииргэ сылдьар сыллааҕы уопсай үптэрэ, 2025 сыл түмүгүнэн, 810,5 млрд солк. тэҥнэспит. Бу биэс сыллааҕыга тэҥнээтэххэ, 57,9% үгүөрү буолбут.  

Урбааны, урбаанньыттары өйүүр тиһик олохтоммут.  Ол курдук хас улуус аайы “Мин биисинэһим” үлэлиир. Урбааны сайыннарыы пуондата сыллааҕыта 1–13%-наах чэпчэтиилээх кирэдьиит биэрэр. Былырыын, 2025 сыл устата, итинник чэпчэтиини туһанан, урбаанньыттар 689,34 мөл. солк. ылан дьарыктарын сайыннарарга, кэҥэтэргэ туһаммыттар, быйылгы сылга киириэхтэн 441,65 мөл. солк. ылан туһаммыттар.

Кинилэр ылбыт иэс үптэрин 70 бырыһыаныгар Мэктиэлиир пуонда поручитель буолбут. Ол курдук, былырыын туһааннаах пуонда 405,48 мөл солк. мэктиэһит буолан, урбаанньыттар холбоон,   1 801,10 мөл. солк. кирэдьиити ылар кыахтаммыттар.

Олохтоох бэйэ оҥорон таһаарыытын территориялара тэриллэн, нолуокка чэпчэтии (преференция) көрүллэр кыахтаммыт.

Кэнники сылларга олохтоох туризмҥа балай эмэ хамсааһын тахсыбыта көстөр. Онуоха “Туризм уонна ыалдьытымсах буолуу” национальнай бырайыак чэрчитинэн туризмы сайыннарыыга субсидия көрүллэрэ туһалаабыт буолуон сөп. Сыччах быйыл 30,3 мөл.  солк., субсидия анаммыт.