“Бизнес-Экспо-2026” быыстапка буолара чугаһаата

Бу туһунан СӨ Урбаан, атыы-тутуу уонна туризм министиэристибэтин иһинэн үлэлиир “Мин биисинэһим” киин иһитиннэрэрэ.

“Бизнес-экспо”  сарсыарда  10:00 чаастан саҕалаан, киэһэ 19 чааска диэри үлэлиир. Билэргит курдук, маннык универсальнай быыстапка хас сыл аайы ыытыллара үтүө үгэс буолла. Быйылгы тэрээһин Саха сирин урбаанньыттарын “Эрэйгиэн биисинэһэ. Улаатар, сайдар кэм” диэн пуорумнарын чэрчитинэн ыытыллар. 

Быыстапка олохтоох оҥорон таһаарааччы бородууксуйатын бар дьон билиитигэр таһаарар, билиһиннэрэр уонна өрөспүүбүлүкэ тэрилтэлэрин икки ардыгар дьыалабыай сыһыаннаһыыны кэҥэтэр сыаллаах.

Оттон урбаанньыттары өйөөһүн “Көдьүүстээх уонна күрэстэһэр кыахтаах экэниэмикэ” диэн дойду бэрэсидьиэнэ Владимир Путин көҕүлээһининэн бэлэмнэммит национальнай бырайыак чэрчитинэн оҥоһуллар.

Быыстапка кыттыылаахтара, ыалдьыттара, көрө кэлбит дьон олохтоох оҥорон таһаарааччылар бородууксуйаларын, саҥа оҥоһуктарын, табаардарын сүрэхтииллэрин көрүөхтэрэ. Манна, этэргэ дылы, саха санаабыт табаара, араас аһа-үөлэ барыта баар буолуоҕа.

Тирии оҥоһуктары, араас таҥаһы-сабы, саха уустара чочуйан-нарылаан оҥорбут кэрэ симэхтэрин, киэргэллэрин, талааннаах тарбахтаахтар илиилэрин сылааһын иҥэрэн тикпит иистэрин, минньигэс, иҥэмтиэлээх гына астаммыт араас суол аһы-үөлү көрөр, атыылаһар кыах бэриллиэ. Маастар кылаастар, муода көрдөрүүтэ, кулинарнай астары амсатыы буолуоҕа. Шеф-асчыттар бастыҥ астарын билсиэххит. Ас-үөл, табаар атыыластахха билиэт биэрэллэр, ол билиэттэринэн сыаналаах бириистэр оонньонуохтара.

Быйылгы быыстапкаҕа урбаанньыттар уонна бэйэ дьарыктаах инбэлииттэр Арассыыйатааҕы "ИНВАСТАРТАП:" слёттарын эрэгийиэннээҕи түһүмэҕин  кыттыылаахтарын бородууксуйата эмиэ туруоҕа. Бу түгэн ураты инклюзивнай бырайыактары кытта билсэр уонна биир дойдулаахтарбыт социальнай көҕүлээһиннэрин өйүүр кыаҕы биэрэр.

Дьаарбаҥка сиһилии бырагырааматын бу сигэни баттаан киирэн көрүөххүтүн сөп: https://мойбизнес14.рф/news/zhitelej-i-gostej-yakutii-priglashayut-na-vystavku-biznes-ekspo-2026/

Манна даҕатан эттэххэ, судаарыстыба урбаанньыттары тугунан, хайдах быһыылаахтык өйүүрүн, өйөбүл ханнык миэрэлэрэ баалларын, ыытыллар куонкурустар, быыстапкалар, чугас кэм иһинэн ыытыллыахтаах тэрээһиннэр тустарынан  Мойбизнес14.рф. порталга киирэн билсиэххэ сөп.