Бас билэр дьиэлэнин — дьол!

Дьокуускайга элбэх оҕолоох ыал ахсаана сыллата элбии, хаҥыы турар. Ааспыт сылга куорат сиригэр-уотугар 4 тыһ. тахса оҕо күн сирин көрбүт. Бу туһунан Дьокуускай куорат баһылыга Евгений Григорьев “Эдэр ыалы олорор дьиэнэн хааччыйыы” бырагыраамаҕа киирбит ыалларга дьиэ атыылаһалларыгар эбэтэр тутталларыгар көрүллэр субсидия сэртипикээтин туттарыы үөрүүлээх чааһыгар бэлиэтээн турар.

Эдэр ыал оҕолорун улаатыннаралларыгар бас билэр дьиэлээх буолаллара улахан суолталааҕын, кинилэри социальнай өттүнэн өйөөһүҥҥэ соруктаах үлэ ыытылларын иһитиннэрбитэ. Олортон биирдэстэринэн өрөспүүбүлүкэтээҕи “Хаачыстыбалаах дьиэнэн хааччыйыы” бырагыраама иитинэн хаһыс да сылын көдьүүстээхтик үлэлиир “Эдэр ыалы олорор дьиэнэн хааччыйыы” хос бырагырааманы ааттыахха сөп. Кэнники сылларга бу бырагырааманан элбэх эдэр ыал бас билэр дьиэлэнэригэр тирэх буолар көмөнү ылла.

Бу федеральнай, өрөспүүбүлүкэтээҕи уонна олохтоох бүддьүөттэн  үбүлэнэр бырагырааманан эдэр ыал дьиэ атыылаһалларыгар эбэтэр тутталларыгар социальнай төлөбүрү ылыахтарын сөп.

Муус устар 16 күнүгэр Куорат Мунньаҕын ыччат бэлиитикэтигэр, физическэй култуураҕа уонна спорка бастайаанай кэмитиэтин уопсай мунньаҕар «Эдэр ыаллары олорор дьиэнэн хааччыйыы» хос бырагыраама былырыыҥҥы түмүктэрин уонна быйыл былааннанар үлэлэри «Дьиэ-уот сыһыаннаһыыларыгар департамент» МКУ дириэктэрин солбуйааччы Вадим Семенов билиһиннэрэн турар. Ол курдук, 2024 сылга 17 эдэр ыал үбүнэн өйөбүлү  ыларга сайаапкалара бигэргэммит. Быйыл 11 ыал дьиэлэнэргэ көмө субсидия сэртипикээттэрин туппуттар.