Билсиҥ: «ErikaSalus» олохтоох эко-косметика бренин ааптара

Балаҕан ыйын 25-26 күннэригэр Дьокуускай куорат “Кыайыы 50 сыла” успуорт уораҕайыгар, “Биисинэс эрэгийиэнэ. Үүнэр-сайдар кэм” өрөспүүбүлүкэ урбаанньыттарын форумун чэрчитинэн, “Инва-Экспо” быыстапка дьаарбаҥка буолан ааста. Манна Саха сирин 15 оройуонуттан 70 олохтоох табаары оҥорооччу кыттыбыт.

Үлэ чааһа бүтээтин кытта, “бары тарҕаспатылар ини” диэн саныы-саныы, ыксаан-бохсоон тиийбитим, хата, дьон балай эмэ баара. Сорохтор бараары хомуна сылдьаллара. Табаар эгэлгэтин кэрийэ көрө сылдьан, сэргээбит табаардаах дьоммор тохтуурга сананным.

Олохтоох оту, үүнээйини туһанан косметика балай эмэ көрүҥүн бэлэмнээн, остуолугар тэлгэтэ уурбут, истиҥ мичээрдээх саха номоҕон кэрэ куотугар чугаһаан, аргыый кэпсэтэн бардым.

Онтум Хаҥалас Улахан Ааныттан сылдьар, онно кийиит буолан сүктэн кэлэн олохсуйбут, Өймөкөөн Томторуттан төрүттээх,  Эрика Сысоева эбит. Бэйэтин аатынан ааптарыскай «ErikaSalus» диэн бренд оҥостон, айа-тута сылдьар. Бу салааҕа ылсан үлэлэспитэ үс сыл буолбут. Сайын устата эмтээх, битэмииннээх оттору хомуйан, хатарар, куурдар.

Салгыы Эрика Констатиновна кэпсээнин истиэҕиҥ:

– Ол онтубунан паарынан, глицерини туһанан, араас вытяжкалары оҥоробун. Ону кытта натуральнай, сыта суох арыыны туттаммын, эко-косметикалары бэлэмниибин. Илии, сирэй тириитигэр, баттахха аналлаах уходовай косметика. Холобур, бу кыһыҥҥы тымныы кэмҥэ туттуллар арыылаах (маслянай) крем. Тымныыттан илиилэрин тириитэ хатар, устунан тириилэрэ хайыта барар дьоҥҥо олус туһалаах. Сыттаах, сыта суох диэн арахсар. Ону тэҥэ оҕоҕо, эр дьоҥҥо, дьахталларга барыларыгар барсар крем эмиэ баар. Сыта суох. Онон аллерген дьоҥҥо кытта барсар. Оттон бу – уоска соттор, сымнатар бальзам. Баттахха туттуллар шампуннар, кондиционнердар, мааскалар кэрискэлэрэ эмиэ баар. Ол иһигэр баттах үүнэрин тэтимирдэр, хойуннарар састааптаахтары бэлэмниибин. Сирэй кириэмин хас да көрүҥүн  оҥоробун. Тириини эдэримситэр сыворотка эмиэ баар. Ону таһынан гидролат оҥорорго ылыстым. Онтубар бэс мас иннэтин, оҕонньор отун (Вероника седая)  уонна суорат отун эбэбин. Киһи иммунитетын, организм ыарыыны утарсар күүһүн улаатыннарарга көмөлөөх. Манныгы иһэ сылдьар киһи вируснай ыарыыларга хаптарымтыата суох буолар. Искэ-үөскэ үчүгэй.

– Бэйэҥ туох идэлээххини, ханна үөрэммиккин билиһиннэриэҥ буолаарай?

– Хелс-коуч үөрэхтээхпин. Судургутун эттэххэ, ити – доруобуйа тириэньэрэ, олоҕу олоруу уобараһын уларытарга көмөлөһөр идэ.  Ону таһынан нутрицологка үөрэммитим. (Нутрицолог диэн – аһылык, ас састааба эккэ-сииҥҥэ дьайыытын үөрэтэн, киһи доруобуйата тупсарын, күүс-уох мунньунарын, олоҕу олоруу хаачыстыбата тупсарын туһугар тустаах киһиэхэ барсар рациону таҥан, сүбэлээн биэрэр исписэлиис. Диетолог быраастан уратыта – ыарыы диагноһын туруорбат, ыарыыны эмтээбэт. Аһыыр үөрүйэҕи, туох битэмиин, минерал тиийбэтин быһаарсан, сөпкө аһыырга көмөлөһөр  –Л.) Спорт өттүгэр эмиэ сыһыаннаахпын. Пилатеһынан дьарыктанабын. Ону тэҥэ ароматерапевт үөрэхтээхпин. Ылбыт билиибин түмэн, дойдум дьонугар дьиҥ туһалаах косметиканы оҥорорго дьулуһабын.

– Туох санааттын чуо бу маннык хайысхаҕа – косметика бэлэмигэр ылсыбыккыный?

– Эфирнэй арыылары үөрэтэ сылдьан, бу эйгэни сэргээн барбытым. Уопсайынан, оҕо эрдэхпиттэн хайдах эрэ бу өттүгэр интэриэстээх этим. Кэлин ыал буолан, оҕолонон баран, адьас кыра эрдэхтэриттэн саҕалаан, оҕолорбор эми иһэрдибэт буоларым. Айылҕа отун-маһын туһанааччыбын. Устунан крем оҥоруохха баар эбит диэн санаа киирбитэ. Кыра-кыралаан оҥорор көрүҥмүн элбэтэн испитим. Дьиҥинэн, кыралаан, бэйэм дьиэ кэргэммэр анаан дьарыктаммытым быданнаата. Идэ, тус дьарык гына тэриммитим үһүс сылым.

– Бу маннык дьарыгынан киһи ылла да дьарыктанан барбат. Кырата, тэрил, сырье да булунарга тирэх хапытаал ирдэнэн эрдэҕэ. Ити өттүн хайдах быһаарбыккыный? Урбаанньыт быһыытынан, судаарыстыбаттан көмө ылбытыҥ буолаарай? Олох бэйэҥ кыаххынан дуу?

– Бэйэм кыахпынан, туораттан өйөбүлэ суох, сыыйа-баайа оҥорбут бородууксуйабын кыра-кыралаан атыылаан саҕалаабытым. Билигин да оннук: бэлэмниибин, атыылыыбын, ол үппүнэн туох ирдэнэрин атыылаһабын. Ити курдук, сыыйа элбэтэбин. Кэргэним өйүүр. Атын үлэм суох, кыһыннары-сайыннары бу мантыбынан дьарыктанабын. Сайынын от хомуйабын, ыһыахтарга сылдьан дьону көрсөбүн, атыылыыбын. Бу сайын Камчатка Елизово куоратыгар сыллата тэриллэр Табаары оҥорооччулар улахан быыстапка-дьаарбаҥкаларыгар тиийэ сырыттым. Атыы-эргиэн палаатата тэрийиитинэн барбыппыт. Олус сэргииллэр. Камчаткалар бэрт холку-наҕыл, аламаҕай дьон эбит. Айылҕалара да олус үчүгэй. Ол гынан баран, кинилэргэ олохтоох үүнээйиттэн, оттон-мастан ким да косметиканы оҥорбот эбит. Ол да иһин буолуо, сэргээн көрдүлэр, ыллылар. Ол иннинэ эрдэ, Улан Үдэҕэ тиийэ сылдьыбытым.

– Эрика, Саха сиригэр олохтоох оту-маһы туһанан, косметика эгэлгэтин оҥоруу балай эмэ тарҕанан эрэр диэн көрөбүн. Биир дьарыктаахтаргын кытта алтыһаҕыт, уопут атастаһаҕыт дуу?

– Суох. Ол оннугар атын куоракка үлэлиир, бииргэ үөрэммиттэрбин кытта сибээстэһэбин, санаа, идея атастаһабыт.

–Онлайн атыынан эмиэ дьарыктанаргын эттиҥ. Оттон “Валдбериз” курдук бөдөҥ маркетплесйтар нөҥүө атыылаан көрүөххүн саныыгын дуу?

– Ол туһунан толкуйдуу иликпин. Кыайан батарбат гына, оннук элбэҕи оҥорбоппун даҕаны. Иккиһинэн, чуолаан бэйэм дьоммор анаан оҥоробун. Тоҕо диэтэххэ, биһиги килиимэппит, айылҕабыт, олорор усулуобуйабыт да чыҥха атын. Кыһыммыт уһун, тымныы. Эппит-сииммит, тириибит да тутула онон киин сирдэр олохтоохторуттан уратылаах. Ону барытын учуоттаан оҥорор буолан, олохтоох дьоҥҥо, усулуобуйаҕа ордук барсар, туһалыыр косметика эбээт.

– Бородууксуйаҥ көрүҥэ, хаҕа, суута да, көрдөххө, араас. Маны хантан хааччынаҕыный?

– Анаан дьарыктанар кыргыттар нөҥүө Кытайтан сакаастыыбын. Наклейкатын эҥин дизайнерга оҥорторобун.

– Эрика, кэпсээниҥ иһин, махтанабын. Ситиһиилэри баҕарабын!

Кини бу сонун дьарыгар бастаан бэйэ дьарыктаах быһыытынан ылсыбыта. Эрика ис сүрэҕиттэн кыһаллан-мүһэллэн оҥорор натуральнай косметиката 2024 сыллааҕы “Бизнес-Экспо” быыстапка-дьаарбаҥкаҕа “Бастыҥ саҥа бородуукта” номинацияҕа бастаан турар.