Билии күнүгэр сибэкки дьөрбөтүн хайдах талабыт?

Балаҕан ыйын 1 күнүнээҕи сибэкки дьөрбөтүн таларга тэттик сүбэлэри “ЛюбиДари” салон флориһа Ираида биэрдэ:

• Саамай өр турар сибэккилэр – хризантемалар, кинилэр 1-2 нэдиэлэ устата кэрэ көрүҥнэрин сүтэрбэттэр. Гипсофила – төһө баҕарар өр турар, аны хатаран баран сухоцвет курдук туруоруохха сөп – интерьери киэргэтиигэ, тупсарыыга үгүстүк туттуллар. Диантус – гвоздика бииһин ууһа. Дьон гвоздиканы кыһыл эрэ өҥнөөх  курдук саныыр, оттон билигин араас дьэрэкээн өҥнөөх гына үүннэрэр буоллулар. Диантус ууга өр сибиэһэй туруон сөп.
• Саамай түргэнник өлөр сибэкки – гортензия. Кыратык сыыһа-халты тутуннугут да, иинэн-хатан барыан сөп, хаппырыыс соҕус, наһаа элбэх ууну сөбүлүүр. Үчүгэйдик көрдөххө-иһиттэххэ, 1 нэдиэлэ туруон сөп. Кини көстүүтэ ураты кэрэ уонна сыаналаах сибэккилэргэ киирсэр, Дьокуускайга гортензия биир умнаһа 900-1000 солк. саҕаланар сыаналаах.
• Корзиналаах, суумкалаах, флористическай губкаҕа олордуллубут букеттарга күн өрүү-өрүү, дьөрбө төһө уулуурун көрөн, уутун кутан биэрэ сылдьыахха наада.
• Эустома, кустовой розалар, көннөрү биирдиилээн роза араас суортара – хаһан да муодаттан тахсыбат, дьыл хайа да кэмигэр атыыга барар классика. Эмиэ үчүгэйдик көрөн үйэтин уһатыахха сөп. Ууга кутар араас эбиликтэри, уоҕурдуулары тутталлар.
• Сибэкки дьөрбөтүгэр тренд, муода диэн суутун матырыйаалыгар, дьөрбө уопсай быһыытын-таһаатын киэргэтиигэ баар буолуон сөп. Уопсайынан атыыга кэлэр сибэкки көрүҥэ дьыл кэмиттэн уларыйан иһэр; холобур, саас тюльпан кэнниттэн пионнар сезоннара саҕаланар. Онтон сайын гортензиялар, күһүҥҥүттэн хонуу сибэккитигэр майгынныыр сибэккилэр, герберэлэр кэлиэхтэрэ (эмиэ вазаҕа өр турар сибэккилэр).
• Сибэкки дьөрбөтүн быыһыгар туттуллар гипсофила, эвкалипт – хатарыллан баран эмиэ туттуллуон, киэргэл буолан туруон сөп.
• Оскуола оҕолоругар, ордук маҥнайгы кылааска барааччыларга, ыйааһына чэпчэки, дьоҕус дьөрбөлөрү ыларгытыгар сүбэлиибин. Кыра оҕо маҥнайгы учууталыгар илдьэр дьөрбөтүн сылайбакка, алдьаппакка илдьэн туттарарын курдук талыҥ. Уопсайынан, сибэккини эрдэ сакаастаан кэбиһэр ордук, үчүгэй сибиэһэй сибэкки эрдэ бүтэн хаалыан сөп.
• Быйыл Дьокуускайга сибэкки дьөрбөтүн сыаната 1000-1500 солк. саҕаланыаҕа. атырдьах ыйын бүтэһик күнүгэр уонна балаҕан ыйын 1 күнүгэр сибэкки маҕаһыыннара үлэлиир эрэсиимнэрин уһатан биэрээччилэр.