Бииртэн биир сыһыарыы App Store–тан сүтэр

Суруйалларыттан көрдөххө, Apple хампаанньа быктарбытынан, итинник быһыы-майгы сааҥсыйаны кытта сибээстээх.  Ол гынан баран чопчу ханнык сааҥсыйатыттан сылтаан суох гыммыттара биллибэт.
Оттон эрдэ, App Store баар эрдэҕинэ, хачайдаммыт сыһыарыылар билигин да үлэлииллэр. Ол гынан баран ити сыһыарыылар push-уведомлениелара тохтообут дииллэр. Айфоннаахтар, бэрэбиэркэлэнэн көрүөххүтүн сөп.
Ол курдук, эрдэ хачайдаммакка хаалбыт айфоннаахтар «ВКонтакте», «VK Музыка», «VK Мессенджер»,  «VK Видео», «VK Знакомства», «VK Звонки», VK Admin, VK Play, «VK Почта», «Почта Mail», «Облако Mail»,  «Дзен», «Одноклассники»,  Skillbox,  «Юла», «Маруся» сыһыарыыларын мантан инньэ туһанар кыахтара суоҕун куйаар ситимигэр кэпсэтэллэр.
Чуолаан, «Почта Mail», «Облако Mail» ,  «Юла»,  «VK Звонки» суох буолара үгүстэри долгутуон сөп. Бассаап кыайан холбоммот буолбутугар ВКонтакте нөҥүө биидьийэ сибээһи үгүстэр туһаналлар этэ. Мантан салгыы бу боппуруос хайдах быһаарыллара буолла?