Бииртэн биир хобдох “сюрприз”!

“Туймаада-Ньиэп” 95-АИ бэнсиинин биир лиитирэтин бу иннинэ 96 солк. атыылаһар эбит буоллахпытына, билигин 105 солк. төлөһөргө тиийэбит.

Оттон АИ-92 мааркалаах бэнсиини “топливнай каарталаахтарга” эрэ куталлар. Сыаната  (л) – 99 солк. Диисэл уматыгын сыаната оннунан хаалбыт – 106 солк.

Бу иннинэ, ол эбэтэр, алтынньы 1 күнүттэн, “Сибойл” атыылыыр сыаната үрдээбитэ. АИ-95 сыаната 3 солк. үрдээн, лиитирэтэ 99 солк. буолбута.

АИ-92 (эффект К-5) 4 солк. улаатан, 98 солк. ыларга тиийэҕин. АИ-92К-5 сыаната -- 96 солк. буолбут.

Оттон АИ-98 куттааччылар биир л иһин, 128 солк. төлөһөллөр. “Сибойлга” диисэл уматыгын 1 л бу иннинэ 107 солк.буоллаҕына, алтынньыттан – 120 солк.

Ол аата, Дьокуускай куоракка бэнсиин уонна диисэл уматыгын сыанатын үрдээһинэ 3-13 солк. иһинэн халбаҥныыр.

Соһуччу үрдээһин диэҕи, омун буолуоҕа. Дойду ньиэп таҥастыыр собуоттара дэлби тэптэрииттэн  алдьанан, хаалбыт собуоттар анараалар хааччыйа олорбут кээмэйдэрин эмиэ хааччыйан эрдэхтэрэ. Онон сыана хаһан эрэ тиийэн, син биир үрдүөхтээҕэ өйдөнөр этэ. Дойду кэккэ эрэгийиэннэригэр үрдээбитэ иһиллибитэ. Тоҕо барыларыгар тута үрдэппэтэхтэрэ эмиэ сэрэйиллэр. Бэл, сыллата үрдүүр хомунаалынай өҥө сыанатын үрдээһинин Арассыыйаҕа быыбар кэнниттэн көһөрбүттэрэ.

Ил Дархан соторутааҕыта олохтоох ТВ-га буолбут быһа эпииригэр уматык кыһалҕатын, биллэн туран, эмиэ таарыйбыта. Онуоха сүрүн кыһалҕа төрүөтэ логистика ыараханыгар буолбакка, собуоттар эмсэҕэлээбиттэрэ буоларын эппитэ. Вице-премьер Александр Новак салайааччылаах федеральнай штаб эрэгийиэннэргэ уматык тиэллиитин уонна чэпчэтиилэри эр-биир көрөн, тыырар эбит.

Хотугу таһаҕаһы тиэйии квотата Арктика оройуоннара уматыкка наадыйыыларын толору хааччыйарын эппитэ. Ону таһынан  дойду үрдүнэн бэнсиин собуокка атыыланар сыаната биллэ үрдээбитин, ол үрдээһин сотору Саха сиригэр кэлиэҕин, бу кыһалаҕаны хонтуруолга тутуоҕун да тумнубатаҕа. 

Атын эрэгийиэннэргэ, дойду үрдүнэн балаһыанньа хайдаҕый?

Уматык сыаната, өр-өтөр буолбата, илэ-бааччы үрдээтэ. Мантан сиэттэрэн атын, ыаллыы эрэгийиэннэргэ балаһыанньа хайдаҕа сэҥээрдэр. Онон түргэн-тарҕан туттуулаах, барыны бары билэр-көрөр Оҥоһуу Өй биэрэр чахчытын көрүөҕүҥ.

-- Бу дьыл алтынньытын туругунан, Уһук Илин эрэгийиэҥҥэ уматык сыаната эрэгийиэниттэн уонна биирдиилээн АЗС-тарынан тутулуктанан, араастаһар. Холобур,“ННК” уонна “Роснефть” курдук бөдөҥ хампаанньалар сыаналара,үгэс курдук, тутулуга суох, чааһынай заправкалар сыаналарыттан биллэ намыһах буолар.

Итинник быһааран туран, бөдөҥ хампаанньалара АЗС-тарыгар биир 1 л уматык сыаната, ортотунан, манныгын көрдөрдө.

АИ-92  бэнсиин

Хабаровскай куоракка –  72,92-72,97 солк.халбаҥныыр,

Приморье кыраайыгар – 73,47 -73,50 солк.

Камчаткаҕа – 76,26 -78,52 солк.

Саха сиригэр – 96-99 солк.

АИ-95 бэнсиин

Хабаровскай куоракка – 75,69 – 75,70 солк.

Приморье кыраайыгар –74,66 – 74,70 солк.

Камчатка кыраайыгар – 81,65 – 83,91 солк.

Саха сиригэр – 99,00 – 105,00 солк.

Диисэл уматыга

   Хабаровскай к. – 89,04 – 89,36 солк.

   Приморье кыраайыгар – 89,37 – 89,40 солк.

   Камчатка кыраайыгар ­– 95,12 – 97,66 солк.

   Саха сиригэр – 106,00 – 120,00 солк.

Уһук Илин үрдүнэн муҥутуур үрдүк сыана – биһиэхэ

Уһук Илин үрдүнэн муҥутуур үрдүк сыана, күһүҥҥү сыана үрдээһинин кэнниттэн, көрбүккүт курдук, Саха сиригэр олохтоммут. Дьокуускай АЗС-тарыгар, л бэнсиин сыаната, ортотунан, 99 –105 солк. иһинэн халбаҥныыр. Диисэл уматыга эмиэ – биһиэхэ муҥутуур үрдүк.

Уһук Илин уокурукка биһиги кэннибититтэн Камчатка (чиэски сирдэригэр л бэнсиин  102,60 солк. буолбут учуоттаан), үһүс миэстэҕэ – Магадан уобалаһа, ол кэнниттэн Сахалин уонна Чукотка автономнай уокуруга сылдьаллар.

Дойду таһымыгар

Оттон Арассыыйа эбэ хотун үрдүнэн уматыкка муҥутуур үрдүк сыана Крымҥа уонна Севастопольга олохтоммут. Итини Росстат уонна ырытар-анаарар ааҕыныстыбалар чахчылара көрдөрөр.

Ол курдук, Севастополь куоракка биир л бэнсиин, ортотунан ыллахха, 166 солк.,74 харчыга диэри буола  халлааннаан харбаспыт! Кинилэргэ АИ-95 бэнсиин, ортотунан ыллахха, 148 солк. атыыланар эбит! Премиальнай уматыктара итинтэн өссө үрдүк сыаналаах.

Крымҥа бэнсиин сыаната, ортотунан, 161,71 – 163,03 солк. халбаҥныыр. АИ-92 бэнсиин сорох заправкаларга, саппаас аҕыйыыр кэмнэригэр, лиитирэтэ 123 солк. тиийэ сылдьыбыт. Оттон АИ-95 олох да 170 солк. тиийэр эбит.

Дойду таһымыгар муҥутуур үрдүк сыаналаах бэнсииннээхтэргэ үһүс миэстэҕэ  – бэйэбит курдук өрөспүүбүлүкэ – Тыва сылдьар. Кинилэргэ Сибииргэ бастакынан АИ-92 бэнсиин 1 лиитирин сыаната 100 солк. таһыччы баран, эрэгийиэн үрдүнэн, ортотунан ыллахха, 118 солк., 24 харчы буолбут.

Тыва кэнниттэн Дагестан өрөспүүбүлүкэтэ сылдьар. Кинилэргэ л бэнсиин ортотунан сыаната – 116,05 солк. Оттон бу ааспыт сайын, уматык диписиитэ муҥутаан улааппыт кэмигэр биир л бэнсиин букатын да 135-140 солк. буола сылдьыбыт.

Ол кэнниттэн Калмыкия өрөспүүбүлүкэтэ кэлэр, бэнсиин биир л кинилэргэ – 103,20 ₽ солк.

Кылгастык билиһиннэрдэххэ, балаһыанньа билиҥҥитэ итинник. Саатар, мантан салгыы улааппатар бэрт этэ. Төттөрү түһэрэ, дьэ, саарбах буолуо?