Бииргэ буолуу дойдуга бэриниилээх буолуу бигэ тирэҕэ

Атыннык эттэххэ, биһиги сатабылбытын, билиибитин-көрүүбүтүн туһанан олох хайа баҕарар эйгэтигэр, хайысхатыгар дойдубутун ааттатардыы сырыыларбыт, дьыалаларбыт, үлэбит-хамнаспыт буолар.

Бу күннэргэ Нам улууһугар СӨ элбэх нэһилиэнньэлээх нэһилиэктэрин икки ардыларыгар волейболга өрөспүүбүлүкэ таһымнаах улахан күрэх буолан ааста. Онно Хатаспыт аатын-суолун көмүскүү толору састааптаах эр дьон уонна дьахталлар хамаандалара ситиһиилээхтик кыттан кэллилэр. Бары билэрбит курдук, Хатас нэһилиэгин аата волейбол эйгэтигэр бастыҥнар кэккэлэригэр баар. Бу үрдүк таһымы мүлчү туппат туһугар бэл диэтэр 8 сыл устата спорт саала суох кэмигэр туруулаһан, тулуктаһан кэллибит. Бу сыллар тухары дьоммут (волейболистарбыт), сатабылы, дьоҕуру сүтэрбэт туһугар, Дьокуускай куорат араас элбэх волейбольнай кулууптарыгар киирэн оонньообуттара кистэл буолбатах. Инньэ гынан “Дьулуур” спорткомплекс аһыллаатын кытта сыаллаах-соруктаах үлэ баран, бары бииргэ хомуллан бэйэ икки ардыгар – түөлбэлэринэн, выпуһунан, араас сыллааҕы хамаандаларынан диэн турнирдар, көрсүһүүлэр, күрэстэр барбыттара.

Бу түгэҥҥэ 7 №-дээх ДЮСШ сыаллаах-соруктаах үлэтэ хайаан даҕаны ахтыллыан наада. Ол курдук кэнники сылларга оҕолорбут араас улахан хомуллубут хамаандаларга ыҥырыллаллара, эбэтэр улахан күрэхтэргэ миэстэлэһэллэрэ сэдэх көстүү буолбатах этэ. Волейболга күн бүгүн хас да көлүөнэ оонньооччу баар буолла уонна үчүгэйэ бииргэ түмүстэ. Бу көстүү ситиһиини өр гыммакка аҕалла. Саха дьонун сиэринэн кыайдыбыт-хоттубут, аатырдыбыт, маладьыастарбыт диэн арбанарга арыыйда туттунабыт, ол эрэн бүтүн өрөспүүбүлүкэ 9 улууһуттан бастыҥнара мустубут 9-туу хамаандаттан 2-с миэстэни ылар көрдөрүү, ситиһии буолара саарбаҕа суох.

Волейбол ааттыын хамаанданан оонньуу буолар. Онон кини дьону түмэргэ, эдэр ыччаты иитиигэ-үөрэтиигэ суолтата сүдү.  Хайҕабыллааҕа биһиги хамаандаларбытыгар хас да көлүөнэ оонньооччу бииргэ буоллулар, Хатаспыт туһугар, Хатас бастыахтаах, инники буолуохтаах диэн кыайыы туһугар биир тыыҥҥа, биир тэтимҥэ киирэн, этэргэ дылы, баарбытын биллэрдибит.

Кинилэр кимнээхтэрий? 1979 сыллаахтан саҕалаан 2000 сылларга диэри волейбол мээчигин туппутунан сылдьар эдьиийдии-балыстыы Татьяна Афонина, Людмила Моисеева,  Павловалар, Соловьевалар (Шишкина, Чичигинарова), уоллаах аҕа Сергей, Михаил Окороковтар, эбэтэр тренердии сылдьар Сергей Андреев, учууталлыы сылдьар Күннэй Герасимова, Медицина национальнай киинигэр үлэлиир Татьяна Кондратьева, спорт эйгэтигэр үлэлиир РФ спордун маастара Семен Слепцов, СӨ кутталлаах быһыыттан-майгыттан  көмүскүүр, харыстыыр киин  үлэһитэ Семен Нестерев, оскуола оҕолоро Игорь Тыркаев, Вова Заровняев эбэтэр бэйэ дьарыктаах Константин Софронов. Дьэ, көрөрбүт курдук араас саастаах, араас идэлээх дьон мустан, биир сыаллаах-соруктаах буолан, биир тыыҥҥа, биир тэтимҥэ киирэн, дойдубут, Хатаспыт туһугар диэн баран түһүнэн кэбистилэр. Өссө биир үтүө түгэн оскуола оҕолорун илдьэ сылдьыы буолара мөккүөрү үөскэппэт. Оскуола саҕаттан кэлиини-барыыны, күрэх тыҥааһынын уйа үөрэммит киһи чиҥ туруктаах буолуо буоллаҕа.

Дьэ ити курдук үтүө сурахтаах күрэҕи сырдатан, кыттыбыт спортсменнарбытыгар махтанан баран, бу күрэххэ барыы үтүө санаа күүһүнэн үбүлэнэн, тэриллэн буолбутун тоһоҕолоон бэлиэтээн туран, аныгыс сырыыга маннык таһымнаах күрэхтэргэ кыттыыга күүс-көмө буолууга бары кыттыһыахпытын наада эбит диэн түмүккэ кэлэбит. Манна барыы-кэлии бензин эрэ кыһалҕалаах буолбатах – бары биир формаланыы уо.д.а. тэрээһин боппуруостара элбэхтэр буоллаҕа дии.