Биир үөрэх кыһатыттан икки диплом

Бу сырыыга инбэлииттэр оскуола-интэринээттэригэр үөрэммит кэмин туһунан «Күүһүн көрдөрөөрү» диэн ахтыытыгар «1943 сыллаахха сэрии инбэлииттэрин үөрэхтиир уонна үлэнэн хааччыйар сыаллаах Минсобес иһинэн үлэлиир “Школа-интернат для инвалидов” диэни тэрийбиттэр» диэн таһаарыыбытын быһаара, быһаарса кэлэ сырытта.

Чахчы да, ааҕан, сыныйан көрбүппүт, 1943 сыллаахха маҥнай сэрии инбэлииттэригэр аналлаах интэринээт эрэ тэриллибит, оскуолата, матырыйаалга туттубут хаартыскабытыгар сурулла сылдьарын курдук, 1947 сылга тэриллибитин быһаардыбыт.

Егор Яковлевич маны сэргэ биир уратыны, ол курдук бу үөрэх кыһатыттан икки идэни ылан, икки диплому туппутун ахтан ааста. «Биир үөрэх кыһатыттан икки дипломнаах киһи баара дуу?» – диэн ыалдьыппыт эйэҕэстик мичээрдиир.

– Ахтыыбар наһаа үчүгэй хаартысканы булан туппуккут. Ити, чахчы, Тимирязев уул., 40 аадырыстаах биһиги үөрэммит интэринээт-оскуолабыт. Арай, хаартыскаҕа «1947" диэн суруктааҕын курдук, 1943 сылга буолбакка, 1947 с. арыллыбыт. Дириэктэрбит Соловьев Василий Сергеевич-Болот Боотур, фронтовик-суруйааччы, оскуола-интэринээт 1947 сыллаахха аһыллыбыта диэбитин өйдүүбүн. Аны туран, завучпут Былатыан Ойуунускай сиэнэ дииллэр этэ. Сирэйинэн аһара майгынныыр, уҥуоҕунан кыра киһи этэ. Багдарыын Сүлбэ эмиэ үлэлии сылдьыбыт этэ.

Кэлин Сэргэлээх шоссетыгар, Зоя Космодемьянская аатынан пионер-лааҕыр чугаһыгар саҥа куорпус туппуттара. 29 №-дээх ПТУ-интэринээт буолбута. Мин бу ПТУ-ну үөрэммэккэ эрэ, биир ыйдаах практикаҕа дьарыктанан, эксээмэн туттаран, 1 унтууну, 1 бачыыҥканы тигэн, «обувщик по индивидуальному пошиву 4 разряда" диэн идэни ылбытым. Бу идэбинэн дьиэлээхтэрбин хааччыйар этим. Онон, биир биир үөрэх кыһатыттан, бастаан 1960 сыллаахха оскуола-интэринээттэн, кэлин 1997 сыллаахха техникумтан икки диплому ылбытым, – диэн Егор Яковлевич ахтар.