Биир сомоҕо буолан

Кыайыыны тэҥҥэ уһансар тыыл үлэһиттэрин, волонтердар тустарынан киһи сөҕө-махтайа, киэн тутта төһө баҕарар кэпсиэн сөп. Кинилэр биир-биэс харчы туһугар буолбакка, хара сарсыардаттан өрөбүлэ, сынньалаҥа суох анараа баар уолаттарбытыгар күүс-көмө буолаллар, иистэнэллэр, сиэккэ өрөллөр, харысхаллары оҥороллор, ас-таҥас ыыталлар, ийэлии, эбээлии кыһамньыларын ууран байыастарбытыгар көмөлөһө олороллор.

Дойдубутугар суоһаабыт алдьархайы суох оҥорор туһуттан анал байыаннай дьайыы кэмигэр дойдубут дьахталлара бары биир сомоҕо буоллулар. Ис сүрэхтэриттэн, кыһамньыларын ууран, күүстэрэ-кыахтара тиийэринэн барыны барытын оҥороллор.

Ол курдук «Бары бииргэ – биир сомоҕо!» диэн волонтердар түмсүүлэрин туһунан сырдатыахпын баҕарабын. Бу түмсүүнү Аллайыаха улууһун Чокурдаах бөһүөлэгиттэн төрүттээх Римма Моисеевна Бережнева уонна Сардана Николаевна Лебедева иилээн-саҕалаан тэрийбиттэрэ. Кинилэр хамсааһыннарын Аллайыаха улууһун бары олохтоохторо, улуус дьаһалтата өйөөбүттэрэ.

Дьокуускай куоракка Крестьянскай ырыынак салалтата түмсүү үлэтин-хамнаһын ыытарыгар аналлаах миэстэ булан биэрбитэ. Ырыынак үлэһиттэрэ бу хамсааһынтан туора турбаттар, мэлдьи көмөлөһөллөр, онон атыыһыттарга махталлара улахан. Омугуттан тутулуга суох күүс-көмө буолаллар. Ол курдук, «Хоттей» ателье салайааччыта Хасанова Дилноза Нарзиллоевна байыастарбытыгар шевроннары тигэр.

Волонтердар үлэлэрэ аадырыстаах баһыылкалары эрэ оҥоруунан муҥурдаммат. Кинилэр хаххаланар сиэккэлэри өрөллөр, наскылары баайаллар, наһыылкалары, кээнчэлэри тигэллэр. Ону таһынан дронтан харыстанар суорҕаннары тигэн передовойга сылдьар байыастарга ыыталлар. Антидроновай плащ-накидкалара түөрт көрүҥүнэн уларыйар, плащ курдук кэтиллэрин таһынан наһыылка, суорҕан буолар, мастан маска тардан тент да курдук туттуохтарын сөп. Волонтердар сырыы аайы уопутуран иһэллэр, үлэлиир технологиялара күн-түүн сайдар, тупсар. Оҕуруонан харысхал оҥороллор, ону Галина Прокопьевна Иванова сахалыы тылынан алгыыр.

Үлэлэрэ өссө тупсарын туһугар кинилэргэ Дьокуускайдааҕы «Народный фронт» производственнай халыҥ таҥаһы тигэр массыына атыылаһан биэрдэ, онон кинилэргэ улахан махтал!  Саллаат уолаттарбыт этэҥҥэ сылдьалларын туһугар Ньурба улууһуттан Евгений харысхаллары оҥорон, бэйэтин көмөтүн уунна, 70 харысхалы оҥорон, уолаттарга ыытта. Төрөөбүт дойдуларын тыынын иҥэриммит харысхаллары уолаттар олус күндүтүк туталлар.

Билигин «Бары бииргэ – биир сомоҕо!» түмсүү Хабаровскай, Владивосток постпредствотын кытта ыкса сибээстээхтик үлэлэһэр, Саха сириттэн сылдьар байыастарга барыларыгар көмөлөһөр. Байыаннай госпиталларга инвалиднай кэлээскэлэри, торуоскалары, баттыктары хомуйан ыыталлар. Манна Чокурдаах, Муома уонна Дьокуускай куорат, атын да улуустар үтүө санаалаах олохтоохторо көмөлөрө улахан.

Ол курдук махталбытын тиэрдиэхпит этэ киэҥ көҕүстээх, сатабыллаах, уус тарбахтаах түмсүүбүт кыттааччыларыгар: Өлүөхүмэ улууһуттан Петрова Л.А., Сунтаартан Иванова Г.П., Муома улууһуттан Нучеканова В.Е., Хабарова С.В., Старкова А.И., Владимирова А.И., Үөһээ Бүлүүттэн Ксенофонтова А.П., Дьокуускай куораттан Шишигина Ю.И. массыынанан маҕаһыыннартан таҥас-сап аҕаларга көмөлөһөр уонна  Чокурдаахтан  Лебедева С.Н., Бережнева Р.М.,  Ийэ дойдутун көмүскүү сылдьан сэрии толоонугар дьоруойдуу охтубут байыас, ефрейтор ийэтэ Сунтаартан сылдьар Пискун Г.И. кэлэн мэлдьи күүс-көмө буолар.

Маннык күүстээх санаалаах, кыайыыга эрэллээх, тугу барытын кыайар кыахтаах ийэлэр, эбэлэр илиилэрин сылааһа биһиги саллааттарбытыгар дойдуларын сылаас тыынын, салгынын тиэрдэллэр. Бу барыта байыастар күүстэригэр күүс эбэр, санааларын бөҕөргөтөр, кыайыыга кынаттыыр. Уолаттарбыт тыыннаах, этэҥҥэ эргиллэн кэлэллэрин туһугар үлэлии-хамсыы сылдьар бары биир дойдулаахтарбытыгар барҕа махталбытын тиэрдэбит. Бары бииргэ, биир сомоҕо буолуохха.

Матрена Ильинична Курилова

Махталбыт муҥура суох

Мин оҕом анал байыаннай дьайыы саҕаланыаҕыттан, 2022 сылтан сылдьар. Бу кыһын уоппускаҕа кэлэн баран, ыалдьан, эмтэнэн, ааспыт нэдиэлэҕэ эмиэ бараахтаата. Оҕобутун ыытыахпытын баҕарбатахпыт иһин, биһиги бас билэр киһибит буолбатах, Оборона министиэристибэтин саллаата, байыаһа буолан, бу уоттаах сэрии уурайан, бүтэн, илии баттаннаҕына эрэ кэлэр диэн хантараактаах. Хаһан да хайыахпытый, эмиэ оҕобутун атаарар, тэрийэр түбүгэр түстүбүт. Куораттар буолан, манна, ханна туох баарын ыйыталаһан, бэйэм ийэлэр бөлөхтөрүгэр баарбын, олор ыйан-кэрдэн, сүбэлээн, Бааһынай ырыынагар баар Римма Моисеевна Бережнева салайар «Бары бииргэ – биир сомоҕо!» түмсүүгэ оҕобунуун бара сырыттыбыт.

Барахсаттар, олус да кыараҕас сиргэ, иккис этээскэ, киоска иһигэр үлэлии, иистэнэ, өссө сиэккэ өрө олороллор эбит. Таҥастарын көрүдүөргэ быһаллар, сиэккэ өрөр тэриллэрин эмиэ төттөрү-таары киллэрэллэр, таһаараллар. Олус диэн соһуйдубут уонна эмиэ да киэн тутта, сөҕө санаатыбыт. Оҕом илэ хараҕынан көрөн, кинилэр тустарыгар түүннэри, күнүстэри, өрөбүлэ да суох үлэлиир,  кыайыыны тыылга уһансар эдьиийдэри, эбээлэри наһаа сыаналыы,  махтана көрдө, ытыктабылын биллэрдэ. Маннык санаалаах кини дойдум дьоно чахчы да бэриниилээхтик көмөлөһөллөр эбит диэн итэҕэйэн, илэ хараҕынан көрөн барда уонна анараа сылдьан биир дойдулаахтарын туһунан киэн тутта кэпсиэм, эйэлээх олоҕу чугаһатыам уонна хайаан да эргиллэн кэлиэм диэн эрэннэрдэ.

Оҕобор гуманитарнай көмөнү таһынан, дронтан харыстанар плащ, суорҕан биэрдилэр, ону таһынан арчылаан, алгыстаан ыыттылар. Онон наһаа үөрдэ, хаххалаах, харысхаллаах курдук сананан барда.

Римма Моисеевналаахтан, атын да волонтердартан оҕом размерын этэн таҥас ыла сылдьан наһаа да харааһынным: «Атын кэм эбитэ буоллар, оҕобор куоракка, сынньалаҥҥа кэтэр куурка, көстүүм ыла сылдьыахпыт эбитэ буолуо», — диэн бирээмэ хараҕым ууланан кэлэр.

Кыайыы хайаан да биһиэнэ буолуо, уолаттарбыт бука бары этэҥҥэ, доруобай эргиллэн кэлиэхтэрэ диэн санаа дууһабын алы гынар. Онуоха кинилэр тустарыгар ыраах Саха сирин хоһуун ийэлэрэ, эдьиийдэрэ, эбэлэрэ ис санааларын ууран, алгыстарын түмэн байыастарбытыгар көмө-тирэх буола туралларыгар сиртэн халлааҥҥа диэри махтанабыт. Эһиги үлэҕит, көмөҕүт кыайыыны чугаһаттын, уолаттар, ийэлэр махталлара кэлэ турдун, үтүө санааҕыт сүүс төгүл бэйэҕитигэр эргилиннин, дьоллоох буолуҥ, чэгиэн сылдьыҥ, уһун олохтонуҥ!

Борисовтар дьиэ кэргэн, Дьокуускай куорат

Уһун уруйдаах олохтонуҥ

Дууһаларын ууран туран ис сүрэхтэриттэн байыаннай дьайыыга сылдьар байыастарга уонна кинилэр дьиэ кэргэттэригэр, көмөлөһө сылдьар, «Бары бииргэ – биир сомоҕо» волонтерскай бөлөххө,  салайааччы Римма Моисеевнаҕа уонна бииргэ үлэлиир волонтердарга, биһиэхэ босхо ис таҥаһынан, эминэн көмөлөспүттэригэр уонна бэйэлэрэ тикпит антидроновай суорҕаны, хаххаланар сиэккэни көмө оҥорбуттарыгар үтүө дьыалаларын иһин  улахан махталбытын тириэрдэбит!

Саха сирин олохтоохторо, туора туран хаалбакка, ким хайдах кыахтааҕынан, бааһынай ырыынакка үлэлии олорор волонтерскай бөлөххө көмөлөһүҥ диэн ыҥырабыт! Бука барыгытыгар ис сүрэхтэн тахсар махтал тылларын аныыбыт.

Ил-эйэ олохтоннун! Күндү дьоммутугар үгүс үөрүүлээх күнү, уһун уруйдаах олоҕу, кытаанах доруобуйаны, күн сиригэр баар үтүөнү, дьоллоох олоҕу баҕарабыт. Биһиги туспутугар ахсаабат кыһамньыгыт, эйэҕэс сыһыаҥҥыт, болҕомтоҕут иһин уруй, махтал тылларын аныыбыт.

Махталы кытта Архиповтар дьиэ кэргэн, Дьокуускай куорат