Биир кэмнээх төлөбүр кээмэйэ — 2 мөлүйүөн солкуобай

«Култуура земскэй үлэһитэ» бырагыраамаҕа кыттарга сайаапкалары от ыйын 15 күнүгэр диэри туталлар. Бигэргэтиллибит испииһэккэ 11 үлэ аһаҕас миэстэтэ киирбит. Бу туһунан СӨ култуураҕа уонна духуобунай сайдыыга министиэристибэтэ иһитиннэрдэ.

Ол курдук, Абый улууһун Белай Гора бөһүөлэгэр, Алдан оройуонун Томмот куоратыгар, Булуҥ улууһун Тиксии бөһүөлэгэр, Ньурба улууһун Маалыкай сэлиэнньэтигэр, Томпо улууһун Кириэс Халдьаайы сэлиэнньэтигэр Оҕо искусствотын оскуолаларыгар фортепианоҕа уһуйааччы, музыкальнай салайааччы дуоһунаһыгар аһаҕас үлэ миэстэтэ баара бэлиэтэнэр. Ону тэҥэ Сунтаар улууһун Кириэстээх сэлиэнньэтигэр Социальнай култуура киинигэр, Эдьигээн оройуонугар Этнокултуурунай сайдыы уонна норуот айымньытын киинигэр, Эбээн Бытантай улууһун Этнокултуурунай киинигэр  балетмейстер (хореограф) ирдэнэр. Кэбээйи улууһун Сангаар бөһүөлэгэр уонна Уус Майа улууһугар Оҕо искусствотын оскуолатыгар хореографияҕа уһуйар үлэһиккэ наадыйаллар, оттон Өлөөн оройуонун Этнокултуурунай киинигэр хормейстер көрдүүллэр. 

Биир кэмнээх төлөбүр кээмэйэ 2 мөлүйүөн солкуобайга тэҥнэһэр. Бырагыраама сүрүн усулуобуйата – биэс сылтан итэҕэһэ суох үлэлээһин.

Үлэҕэ киирээччилэр орто анал эбэтэр үрдүк үөрэхтээх Арассыыйа гражданнара буолуохтаахтар.    

Күрэх хас да түһүмэхтээх.

Бастакы түһүмэх: сайаапкалары тутуу 2025 сыл муус устар 15 күнүттэн от ыйын 15 күнүгэр диэри ыытыллар, салгыы – сыл аайы тохсунньу 10 күнүттэн муус устар 15 күнүгэр диэри.

Иккис түһүмэх: сайаапкалары көрүү уонна сыаналааһын 2025 сыл от ыйын 15-30 күннэригэр буолуоҕа, салгыы – сыл аайы муус устар 16 күнүттэн ыам ыйын 15 күнүгэр диэри.

Үһүс түһүмэх: Министиэристибэ сүүмэрдээһин түмүгүнэн кыайыылаахтар испииһэктэрин бигэргэтэр туһунан быраап аактатын 2025 сыл атырдьах ыйын 15 күнүгэр диэри таһаарар, салгыы – сыл аайы от ыйын 20 күнүгэр диэри.

Төрдүс түһүмэх: үлэҕэ киирээччи уонна култуура тэрилтэтин икки ардыларыгар үлэ дуогабара 2025 сыл балаҕан ыйын 1 күнүгэр диэри түһэрсиллэр, салгыы – сыл аайы атырдьах ыйын 10 күнүгэр диэри.

Бэһис түһүмэх: Министиэристибэ, үлэһит уонна култуура тэрилтэтин икки ардыларыгар төлөбүрү биэрии туһунан дуогабары түһэрсии 2025 сыл балаҕан ыйын 15 күнүгэр диэри ыытыллар, салгыы – сыл аайы атырдьах ыйын 25 күнүгэр диэри.

Алтыс түһүмэх: биир кэмнээх төлөбүр дуогабар түһэрсиллибит күнүттэн халандаар 10 күнүн устатыгар оҥоһуллар, ол эрээри 2025 сыл сэтинньи 1 күнүттэн хойутуо суохтаах.  

Күрэххэ кыттыы усулуобуйатын, ирдэниллэр докумуоннар уонна сайаапкалары тутуу болдьоҕун туһунан сиһилии иһитиннэриини СӨ култуураҕа уонна духуобунай сайдыыга министиэристибэтин саайтыгар «Земский работник культуры» анал салааҕа булуохха сөп: https://minkult.sakha.gov.ru/programma-zemskij-rabotnik-kultury.

Санатан эттэххэ, «Земскэй учуутал» уонна «Земскэй быраас» бырагыраамалары кытта атылыы «Култуура земскэй үлэһитэ» бырагыраама дойду үрдүнэн 2025 сыл тохсунньу 1 күнүттэн Арассыыйа Бэрэсидьиэнэ Владимир Путин сорудаҕынан биллэриллибитэ.

Бырайыак «Култуураны сайыннарыы» судаарыстыбаннай бырагыраама иитинэн олоххо киирэр. Итиэннэ тыа сиригэр, ону тэҥэ оробуочай бөһүөлэктэргэ, куорат тииптээх бөһүөлэктэргэ уонна 50 тыһыынчаҕа диэри  нэһилиэнньэлээх дьоҕус куораттарга үлэлиир исписэлиистэри өйүүргэ туһуланар.