Биир хаартыска историятын сэгэттэххэ...

Саха норуодунай суруйааччыта Егор Неймохов аатынан литератураны уонна кыраайы үөрэтэр түмэл суруйааччы төрөөбүт сиригэр – Томпо улууһун Мэҥэ Алдан нэһилиэгэр – үлэлиир. 2019 уонна 2024 сылларга түмэл «Култуура бастыҥ үлэлээх тэрилтэтэ” үрдүк ааты ылбыта.

Түмэл үлэһитэ Антонина Петровна Ефремова, СӨ үөрэҕириитин туйгуна:

– Саха норуодунай суруйааччыта Егор Петрович Неймохов аатынан литератураны уонна кыраайы үөрэтэр түмэлгэ суруйааччы үлэлээбит кабинетын үтүгүннэрэн оҥорбут экспозицияҕа тутта сылдьыбыт маллара бааллар. Бу маллартан суруйааччы кыра уолунуун Мишалыын түспүт хаартыската – биһиги биир киэн туттуубут.

Ол курдук, 1995 сыллаахха Егор Петрович ыарахан ыарыыга ылларан, өлөр өлүүнү кытта хабыр хапсыһыыта саҕаламмыта. Кини бу ыарыыттан босхолоноругар соҕотох биир суол баара. Ол – донор уоргана. Эпэрээссийэ төлөбүрдээҕин ааһан, сөп түбэһэр уорган көстөрө уустук этэ. Онон Егор Петрович, күн сириттэн арахсара чугаһаабытын этинэн-хаанынан билэн, «дьонум өйдүү-саныы сылдьалларыгар хаартыскаҕа түһүөххэ” диэн этии киллэрэн, фотоустуудьуйаҕа бараллар. Уопсай түһүү кэнниттэн, «мэҥэ тааспар наада буолуо” диэн, соҕотоҕун түһэр. Онуоха кыра уола Мишата: «Оттон мин?” – диэбитинэн сүүрэн кэлэн, аттыгар турунан кэбиһэр. Онуоха Егор Петрович: «Бачча кыра киһибин хаалларан ыарыыга бэринэн кэбиһэрим табыллыбат», – диэн бигэ күүстээх санааны ылынан, өлөр ыарыылыын охсуһан, 1997 сыллаахха Санкт-Петербург куоракка эппэрээссийэлэнэн, олоххо иккистээн эргиллэр.

Онтон ыла бу хаартыска Егор Петрович үлэлиир остуолугар бастыҥ миэстэҕэ турара. Үлэтиттэн барарыгар – атаарар, кэллэҕинэ үөрэ көрсөр ымыыта буолбута.
Ити курдук оҕотун сырдык мөссүөнэ, истиҥ таптала суруйааччы ыарахан ыарыыны кытта киирсиитигэр уонна кыайыытыгар олук буолбут. Бу экспонаты биһиги түмэлбит киэн туттуутунан ааҕабыт.

Оттон эһиги түмэлгитигэр туох дьикти, ураты экспонат баарый?