Биир гараж тула түрүлүөн

Ааспыт нэдиэлэҕэ «Киин куорат» Шавкунов уул., 80, ааһар суолу мэһэйдээн турар гаражтары тиэйии саҕаламмытын туһунан суруйан турар. Манан сатыы дьон сылдьара олус сэрэхтээх, хаамар сир суох буолан, кэлэр-барар массыыналарга киирэн биэриэх курдуктар, онон Киин уокурук управата гаражтары көһөрөр үлэни саҕалаабыта.  

Ону баара... биир гараж бас билээччитэ управа дьаһалын туорайдаһар суолу тобулбут: массыынатын гараж ааныгар ыга анньан туруорбут уонна...  балаҕан ыйын 21 күнүттэн тимир көлөтүн сыҕарыппат. Кыраан үлэлиир кыаҕа суох.  

Киин уокурук управата иһитиннэрэринэн, үлэһиттэр күн аайы кэлэн бэрэбиэркэлииллэр, ол эрээри массыына турбутун курдук турар. ГИБДД-га биллэрбиттэр, ол эрээри онно даҕаны көмөлөспөттөрө буолуо дииллэр.

А123РМ14 судаарыстыбаннай нүөмэрдээх массыынаны бас билээччи гарааһы тиэйэргэ мэһэйдээбэтигэр көрдөһөллөр.

Управа бэрээдэги олохтуур салгыы былааннаах.