Биэнсийэни саҥа быраабыланан анаан эрэллэр

Билигин страховой ыстааска оҕону 1,5 сааһыгар диэри көрөн олоруу кэмэ киирэр. Ол эбэтэр ити кэми үлэ ыстааһын кэмнэрин кытта тэҥҥэ учуоттуохтара.

Урут ийэ оҕоҕо олорбут уоппускатын алта сыла эрэ үлэ ыстааһыгар киирэр буоллаҕына, бу хааччах билигин көтүрүллүбүт. Холобур, урут элбээбитэ түөрт оҕоҕо 1,5-лыы сыл дэкириэккэ олоруу ааҕыллар буоллаҕына, билигин хас биирдии оҕо 1,5 сааһын туолуор диэри көрүү-истии кэмэ барыта ааҕыллыаҕа. Бу уларыйыы биэс уонна онтон элбэх оҕолоох төрөппүттэр биэнсийэлэрин үрдэтиэҕэ.

Тыа хаһаайыстыбатыгар үлэ ыстааһын ааҕыы быраабылалара эмиэ чуолкайданна. Бу үлэ ыстааһа тыа сиригэр олорор, кырата 30 сыл тыа хаһаайыстыбатыгар үлэлээбит үлэлээбэт биэнсийэлээхтэргэ кырдьаҕаһынан уонна инбэлиит буолуу страховкатын биэнсийэтигэр эбии төлөбүр ыларга быраап биэрэр.

Ыйдааҕы эбии төлөбүр страховой биэнсийэҕэ бэриллэр быһыллыбыт төлөбүр 25% тэҥнэһэр уонна биэнсийэлээх киһи куоракка көһөн бардаҕына даҕаны хаалар. Ону таһынан, оҕону 1,5 сааһыгар диэри көрүү-истии бары кэмнэрэ билигин “тыа сирэ” (сельский стаж) үлэ ыстааһыгар туох да хааччахтааһына суох киириэхтэрэ.

Игирэ оҕолоох төрөппүттэр страховкаларын ааҕыы бэрээдэгэ эмиэ көннөрүллүбүт. Элбэх оҕолонор (игирэлэр) түбэлтэҕэ, хас биирдии оҕону көрөн олорбут дьиҥнээх бириэмэтэ ыстааска ааҕыллыаҕа.

Холобур, биир төрөппүт икки игирэ оҕотунан уоппускаҕа сылдьыбыт буоллаҕына, ыстааһыгар үс сыл ааҕыллыаҕа. Үс оҕо төрөөтөҕүнэ, ыстаас 4,5 сыл буолар. Оттон дьиэ кэргэҥҥэ түөрт оҕо төрөөтөҕүнэ уонна биир төрөппүт оҕолор 1,5 саастарыгар диэри дэкириэт уоппускаҕа сылдьыбыт буоллаҕына, үлэтин ыстааһа алта сылынан ааҕыллар. Билигин үлэ ыстааһын уопсай уһунун учуоттуур хааччах суох.