Биэнсийэни, босуобуйаны ылыыга уларыйыылар

Биир кэлим босуобуйаны ыларга аҕыйах киһи хапсыаҕа

От ыйын 21 күнүттэн биир кэлим босуобуйаны ылыы быраабылалара уларыйаллар. Бастакы группалаах инбэлиити эбэтэр 80 сааһын ааспыт кырдьаҕас киһини көрүү-истии (харайыы) аны нолуогу көрдөрбөт буолууга убаастабыллаах биричиинэнэн ааҕыллыбат. Бу быраабыла аймахтарын көрөр-истэр дьоҥҥо эрэ хаалар.

Билигин үлэлиир кыахтаах төрөппүттэр босуобуйаны ылалларыгар дохуоттара олохтоммут таһымтан намыһах буолуо суохтаах. Дохуота суох буолуу маннык биричиинэлэргэ эрэ ааҕыллар: холобур, төрөппүт бастакы группалаах инбэлиити эбэтэр 80-тан тахса саастаах, көрүүгэ-истиигэ наадыйар кырдьаҕаһы көрөр буоллаҕына.

Сорох биэнсийэлээхтэр төлөбүрдэрэ тохтуон сөп

«Арассыыйа почтатынан» биэнсийэтин ылааччы киһи алта ый устата харчытын почта салаатыгар да, почтальонтан да ылбатаҕына, биэнсийэтин төлөбүрүн тохтотуохтарын сөп. Бу туһунан ССТА-ҕа Арассыыйа Бэрэсидьиэнин академиятын старшай преподавателэ Татьяна Голубева иһитиннэрдэ.

Төлөбүрү сөргүтэргэ Социальнай пуондаҕа сайабылыанньа суруйуохха наада. Маны «Госуслуги» портал, СФР килийиэн сулууспата, МФЦ эбэтэр почта отделениета нөҥүө оҥоруохха сөп.

Оттон биэнсийэ баан каартатыгар түстэҕинэ, төлөбүр тохтообот. Харчы каартаҕа түстэ да туттуллубут курдук ааҕыллар, биэнсийэлээх устан ылбатаҕыттан тутулуга суох.

Төлөбүрдэр от ыйын 1 күнүттэн улаатыахтара

От ыйын 1 күнүттэн Арассыыйа сорох олохтоохторун статуһа уларыйдаҕына, эбии социальнай төлөбүрдэри ылыахтара.

• Бэс ыйыгар I группалаах инбэлииккэ бастакытын тахсыбыт киһи фиксированнай төлөбүрэ икки төгүл улаатар (хаттаан эбии төлөбүр оҥоһуллубат);

• Иитимньилээх биэнсийэлээхтэр (18 саастарыгар диэри оҕолор эбэтэр 23 саастарыгар диэри күнүскү үөрэх устудьуоннара) эбии төлөбүрү ылыахтара, кээмэйэ иитимньи ахсааныттан тутулуктаах;
• 30 сылтан ордук тыа хаһаайыстыбатыгар үлэлээбит дьон биэнсийэ фиксированнай чааһыгар 25% эбии төлөбүргэ эрэнэллэр. Маныаха СФР-га сайабылыанньа суруйуохха наада;
• От ыйын саҕаланыыта 80 саастарын туолбут биэнсийэлээхтэргэ эбиллиини автоматическайдык ааҕыахтара. Быйыл бу орто көрдөрүү 10 998,55 солкуобайга тэҥнэһиэҕэ (базовай төлөбүр икки төгүл улаатар, ону таһынан көрүү иһин эбии — 1413,86 солкуобай), ол гынан баран сорох эрэгийиэннэргэ кээписийиэнтэн тутулуктанан суума атын буолуон сөп.