Биэнсийэлээхтэри буулаабыттар

Онон манчыыттаан, кинилэр кырдьаҕас дьон ааттарын-суолларын билэллэр уонна “Госуслуги” судаарыстыбаннай өҥө порталыгар киирэн мунньубут харчыларын суйдаан ылаллар.

Түөкүттэр биэнсийэлээхтэргэ ыам ыйын 9 күнүгэр сөп түбэһиннэрэн наҕараадалары туттарыы туһунан этэллэр. Итэҕэтээри, мэтээллэрин хантан ылалларын, ханна тиийэллэрин уонна кэбиниэт нүөмэрин ыйаллар. Оттон кинилэргэ сиэртибэлэрин тус дааннайдара эрэ наада.

Дьэ бу кэннэ массыанньыктар ылбыт иһитиннэриилэринэн “Госуслуги” порталга тус кэбиниэттэригэр киирэллэр. Ол түмүгэр атын дьон харчытын туһаналлар, кирэдьиит да ылыахтарын сөп, диэн ТАСС иһитиннэрэр.

Маны таһынан түөкүттэр биэнсийэлээхтэргэ Арассыыйа социальнай пуондатын үлэһиттэрэ буолан эрийэн, эбии ааҕыы эбэтэр анал надбаапка туһунан кэпсииллэр, диэн Норуот фронун «Мошеловка» платформатын пресс-сулууспата иһитиннэрэр. Төлөбүрү ылар туһугар сиэртибэлэриттэн каарталарын реквизиттэрин биэрэллэригэр эбэтэр пуонда сыһыарыытын туруоралларыгар көрдөһөллөр, онтулара вирус буолар.

Онон, саастаах дьоҥҥутугар, бэтэрээннэргэ билбэт нүөмэрдэрин ылбаттарыгар, эбии ааҕыы ханнык да сайабылыанньата, төлөпүөнүнэн эрийиитэ суох оҥоһулларын куруук кэпсии, саната сылдьыҥ диэн сүбэлииллэр.