Биэнсийэ уонна социальнай өйөбүл

Быстах кэмҥэ үлэлиир кыаҕа суох буолуу, хат буолуу иһин уонна оҕо төрөөһүнүгэр, ону тэҥэ 17 саастарыгар диэри оҕолорго ый ахсын бэриллэр босуобуйалары анааһыҥҥа пуонда билигин страховкаламмыт дьон сирэй счеттарыттан дааннайдары бэйэтэ ирдээн ылар. Дьон хамнаһын, ыстааһын уонна дьиэ кэргэн састаабын туһунан ыспыраапкалары, бу иһитиннэриилэр сыыппара систиэмэлэргэ баар буоллахтарына, биэрэрэ ирдэммэт.

Бу эдэр төрөппүттэргэ уонна үлэтин үгүстүк уларытар дьоҥҥо олус табыгастаах. Ол гынан баран биир “ноолоох”: өскөтүн үлэни биэрээччи пуондаҕа ааҕыыларын кэмигэр тиэрдибэтэх буоллаҕына, босуобуйаны кыра кээмэйинэн ылыан сөп, оттон эбии ааҕыыны (перерасчёту) хойут, сайабылыанньа киирдэҕинэ, ылыа. Онон эспиэрдэр уоппуска иннинэ “Госуслуги” портал нөҥүө сирэй счет выпискатын бэрэбиэркэлииргэ сүбэлииллэр.

Маны таһынан, от ыйын 1 күнүттэн 80 саастарын туолбут гражданнарга страховой биэнсийэлэригэр олохтоммут (фиксированнай) төлөбүр икки төгүл үрдүүр. Суумата 19 169 солкуобай 38 харчыга тиийиэҕэ (оройуоннааҕы кээпписийиэни учуоттаабакка). Тус сайабылыанньаны биэрэр ирдэммэт – пуонда биир кэлим реестргэ баар суруйууга олоҕуран, сайабылыанньата суох эбии ааҕыыны оҥоруо.

Маннык автоматизация хоту дойду оройуоннарыгар олорор биэнсийэлээхтэргэ эмиэ тарҕанар: кинилэр үрдэтиллибит биир кэлим төлөбүрү ылалларыгар сыл ахсын олорор сирдэрин бигэргэтии ирдэммэт – ИДьМ уонна Росреестр иһитиннэрэр систиэмэлэриттэн дааннайдар тэҥнэнэн бэриллиэхтэрэ.