Бибилэтиэкэ сонун экскурсиялары тэрийэр

Бүгүҥҥү күҥҥэ Саха сирин үрдүнэн 504 бибилэтиэкэ баара биллэр.

Вера Чярина, Марха «Встреча» бибилэтиэкэтин сэбиэдиссэйэ, СӨ култууратын туйгуна:

– 2011 сылтан Дьокуускай куорат бибилэтиэкэтин иһинэн үлэлиир «Библиотека и ее окрестности» диэн бырайыак чэрчитинэн «Пешком в историю» диэн экскурсиябытын ыам ыйын ортотуттан саҕалаатыбыт. Таһырдьа сылаас эрэ кэмнэргэ ыытар экскурсиябытын интэриэһиргээн, улуустан тиийэ кэлэн бардылар. Онон дьон интэриэһэ улааппытыттан үөрэбит.

Экскурсия  бастаан Марха киириитигэр турар стелаттан саҕаланар. Бибилэтиэкэбит тулатыгар сытар уулуссаларбытын кэпсиибит. Онно киирэллэр аттакылар тутан хаалларбыт дьиэлэрэ, таҥара дьиэтэ, «Холбос» маҕаһыына. Бу  Марха уулуссаларыгар үлэлии турбут тэрилтэлэр  историяларын туһунан  билиһиннэрэбит.

Бэтэрээн бибилэтиэкэрдэрбит Альбина Ариносова, Светлана Афанасьева иккиэн бу  экскурсия бырайыагын оҥорон таһаарбыттара. Бастаан саҕалааһыҥҥа бибилэтиэкэ эрэ турар уулуссата эбит буоллаҕына, чинчийии ыытаммыт өссө кэҥэтэн биэрдибит эрээри, истээччигэ олус уһун эбит диэн түмүккэ кэллибит. Онон, бириэмэтин кылгатан, уулуссаларбытынан былааннаан оҥорор сорук турда. Ити курдук, «Кырдьаҕастан – сүбэтин, эдэртэн – эйэтин» өс хоһоон курдук, сүбэбитин холбоон, биир сиргэ турбакка, бырайыак кэҥиир, улаатар. Бу барыта биһиги ааҕааччыларбытыгар, истээччилэрбитигэр туһаайыллар. Оттон оҕолорбутугар анаан бу экскурсия туһунан дьэрэкээн ойуулаах кинигэ-альбом бэлэмнии сылдьабыт. Экскурсия кыттыылааҕа наушник кэтэн экскурсовод кэпсиирин истэригэр олус табыгастаах усулуобуйа тэрилиннэ диэн бэлиэтиэхпин баҕарабын.

Марха историятын интэриэһиргиир куорат олохтоохторун экскурсияҕа кэлэн кыттыыны ыларгытыгар ыҥырабыт.

Библиотека күнүнэн бу идэҕэ үөрэммит эдэр исписэлиистэргэ үлэнэн хааччыллыы хайдаҕын билистибит.

Кэпсэппит эдэр исписэлииспит доруобуйатынан хааччахтааҕын да иһин, бу идэни баһылыырга оҕо сааһыттан баҕарбытын сэһэргээтэ.

Дайаана Колтовская, бибилэтиэкэр үөрэҕин бүтэрбит эдэр исписэлиис:

– 2015 сыллаахха бибилэтиэкэр үөрэҕэр киирэммин, 2019 сыллаахха бүтэрбитим уонна куорат  Гайдар аатынан Оҕо бибилэтиэкэтигэр үлэлии киирбитим. Олус астынан туран үлэлээн испитим. Оҕолорго анаан «Известные люди города» бырайыак оҥорбутум. Хомойуох иһин, штаты сарбыйыыга түбэһэн, уурайарга күһэллибитим. Онтон СӨ Национальнай бибилэтиэкэтин улахан уораҕайыгар үлэлиир дьолломмутум.  Икки сыл бэйэм доруобуйам эппиэттииринэн  үчүгэйдик үлэлээбитим. Өрөспүүбүлүкэ кырдьаҕас бибилэтиэкэтигэр бэйэ-бэйэҕэ ытыктабыллаах сыһыаннаах кэлэктииипкэ үлэлээн элбэххэ үөрэммит кэммин олус үчүгэйдик саныыбын. Билигин үлэм суох. Солбуйа киирбит үлэһитим уоппускатыттан тахсан, эмиэ тохтообутум. Бибилэтиэкэҕэ үлэ көрдөөтүм да, булбатым. Көстөрө буоллар, үөрүүнэн талбыт идэбэр үлэлиэх этим.

Мин үлэлээх буоларым олохпор олус суолталаах. Ол иһин кыра сааспыттан дьарык оҥостубут музыкам үөрэҕэр кэтэхтэн үөрэнэ сылдьабын.

Бииргэ үөрэммит оҕолорбун, үлэлии сылдьыбыт кэллиэгэлэрбин идэлээх күммүтүнэн эҕэрдэлиибин.