«Биһигини сериал холбообута...»

Бу күннэргэ сериал хатылааһына көстө турар, онтон кэлэр ыйга улахан экраҥҥа толору кээмэйдээх киинэ быһыытынан тахсыахтаах. «Киин куорат» кэрэспэдьиэнэ Туяраны кытта кэпсэттэ.   

Кини Бүлүү Халбаакытыттан төрүттээх. Идэтинэн программирование учуутала. Билигин оҕотун көрөн олорор. Оҕо эрдэҕиттэн үҥкүүнэн сөбүлээн дьарыктаммыт. Оттон киинэҕэ уруккуттан да уһуллуон баҕарар эбит. Ол ыра санаата 2023 сыллаахха туолбута.

– Эдьиийим уонна балтым кастинг буоларын истэн, анкетабын ыыттарбыттара. Бастаан сүрүн оруолга талыллыбыппын билбэккэ да сөбүлэспит этим, – диэн билигин күлэ-үөрэ кэпсиир.

Аймахтарын курдук саныыллар

– Саргыны бастаан хайдах эрэ аһына санаабытым. Куруук хомойо, хоргута сылдьар, быһаарыныы ылынан испэт курдук этэ. Ол эрээри кини көрсүө, сэмэй, аһаҕас майгытын сөбүлээбитим.

Көрөөччүлэр эмиэ бастаан Саргыттан кыыһыраллара, ол эрээри персонаж быһыытынан арыллан испитигэр сөбүлээбиттэрэ. Миигин аймахтарын курдук чугастык саныыр буолбуттара. Бобуулаах ситимҥэ суруйаллар, «Биһиги Саргыбыт», «Биһиги Туярабыт» дииллэр.

– Туораттан бэйэҕин көрөр хайдаҕый?

– Сериалбыт бастаан тахсарыгар эйфорияҕа сылдьыбытым. Билигин көрөр чыҥха атын эбит. Ол да буоллар наһаа кириитикэлэммэппин.

– Сериал ситиһиитэ туохханый?

– Олоххо баар кыһалҕалары таарыйар, персонажтара дьоҥҥо чугастар, ол иһин киэҥ сэҥээриини ылбыта буолуо дии саныыбын. Аны тыа сиригэр уһуллубута эмиэ улахан оруолу оонньоотоҕо.

– Өссө ыҥырдахтарына, сөбүлэһиэҥ дуо?

– Сөбүлэһиэм этэ. Биллэн турар, кыра оҕолоох киһи син биир бириэмэбиттэн көрөр буоллаҕым.

Кистэлэҥ этэ...

– Дьэ эрэ, көрөөччү саамай интэриэһиргиир ыйытыытыгар киириэххэ. Ньургуннуун тапталгыт остуоруйата хайдах саҕаламмытай?

– Сериалга уһулла кэлэн баран билсибиппит, онтон ыкса доҕордоһон, сыһыаммыт атын таһымҥа тахсыбыта.

– Кинини бастаан көрөн баран туох дии санаабыккыный?

– Суох... Көннөрү «Олох түгэннэригэр» оонньообутунан эрэ билэрим.

– Айар бөлөх тута билбитэ дуу, барыта кистэлэҥ этэ дуу?

– Оннук этэ (күлэр). Мин кимиэхэ да эппэт буола сатаабытым. Онтон сэрэйбиттэрэ, утуу-субуу билбиттэрэ. Дьэ, уонна дьээбэлээн аҕай биэрбиттэрэ. Бары наһаа үөрбүттэрэ. Ол курдук, биһигини сериал холбообута. Билигин иккиэ бэйэбит үһүө буоллубут. 9 ыйдаах Күннэй диэн кырачаан киһилээхпит.

– Сотору киинэҕит тахсыахтаах. Ыал буолан баран уһуллар хайдах эбитий, атын соҕус буолуо?

 – Биллэн турар, атын. Үс сыллааҕыта бэйэ-бэйэбитин билбэт дьон көрүстэхпит дии. Ол саҕана үлэ эрэ туһунан толкуйдуурбут.

Мин бу сырыыга быстах көстөбүн, Ньургун сүрүн оруолу толорор. Устуу үлэтэ балтараа ыйы быһа сарсыардаттан киэһээҥҥэ диэри буолбута. Мин оҕобун кытта хас эрэ хоно-хоно тиийэрим. Кырачааммытын илдьэ сылдьыбыппыт. Биирдиилээн сыаналарга Ньургуннуун олбу-солбу көрбүппүт. Тэҥҥэ уһуллар буоллахпытына, кэллиэгэлэрбит көтөҕөн, көрөн-харайан абыраабыттара. Хата, ол кэмҥэ атыҥыраһа суох этэ.

– Ийэ буолар хайдах эбитий?

– Дьол! Күн аайы оҕобун көрө-көрө ымманыйабын. Тапталыҥ күүһүрэн, толкуйуҥ кэҥээн иһэр эбит. Кып-кырачаан киһи биһигини дьоллуур!

Эркин курдук эрэнэбин

–  Ороһуоспаҕа «Две звезды» күрэххэ кыттан, Святослав Эверстовтыын «Көрөөччү биһирэбилэ» анал ааты ыллыгыт. Бу бырайыак эйиэхэ тугу биэрдэ?

– Бэйэм туохха барытыгар көхтөөх киһибин, этии киирдэҕинэ, үөрэ-көтө сөбүлэһэбин. Оҕотун көрөн олорор ийэҕэ аралдьыйыы, сэргэхсийии наада курдук. Ити бырайыагы астынным, сөбүлээтим! Аны «Көрөөччү биһирэбилин» ылан, үөрүүм өссө үрдээтэ, дьоллоннум. Святослав олус көмөлөспүтэ, кыттааччы быһыытынан арылларбар, куолаһым иһиллэригэр. Биһиэхэ куоластаабыт көрөөччүлэрбитигэр өссө төгүл махталбын тиэрдэбин.

– Эн блогер быһыытынан биллэҕин. Харах далыгар сылдьар киһи, кириитикэни хайдах ылынаҕын?

– Чэпчэки соҕустук сыһыаннаһабын. Куһаҕаны аһарынан кэбиһэбин. Дьон саҥатын уйар, тулуйар, кыайар эрэ киһи блогер буолар дии саныыбын.

– Сорох блогердар оҕолорун харыстаан көрдөрбөттөр, эн кырачааҥҥын таһаарар эбиккин дии...

– Хара төрүөҕүттэн көрдөрбөтөхпүт, сирэйин кистиир этибит. Улаатан истэҕин аайы каадырга киирэрэ элбээн барбыта, ону сырыы аайы бүөлүөххэ наада, аны хос-хос устар сылаалаах да курдук. Онтон 8 ыйын туолуон иннинэ кэмэ кэллэ диэн көрдөрөргө быһаарыммыппыт. Биллэн турар, барытын таһааран испэппин. Мин сурутааччыларым наһаа үчүгэй дьон! Кинилэргэ эркин курдук эрэнэбин.