Биһиги кэммит биһирэмнээх киһитэ Аркадий Новиков сырдык аата үйэлэргэ тыыннаах!
Бу күн СӨ култууратын үтүөлээх үлэһитэ, Арассыыйа уонна Саха сирин суруналыыстарын сойууһун чилиэнэ, «Көөчөөн көрө» норуот тыйаатырын төрүттээччи, режиссер, артыыс, худуоһунньук, Дьаҥхаады нэһилиэгин, Майа сэлиэнньэтин, Мэҥэ Хаҥалас улууһун бочуоттаах олохтооҕо Аркадий Новиковка анаммыт пааматынньык турда. Норуоттан үүнэн-сайдан тахсыбыт, норуот билиниитин ылбыт киһибит сырдык аата үйэлэргэ Мэҥэ өйдөбүл буолан, дьон сэҥээриитин ылыан ылла.
Кини төрөөбүт сиригэр-уотугар, дириҥ баай устуоруйалаах Дьаҥхаады нэһилиэгэр, өҥ буордаах, сайаҕас ыалдьытымсах дьоннордоох Төхтүр сиригэр алгыһы Спиридон Григорьев-Илгэлээх Испирдиэн түһэрдэ.
Пааматынньык аһыллыыта Төхтүр эрэ сиригэр буолбакка, бүтүн улууска улахан суолталаах, сүрдээх долгутуулаах уонна махталлаах дьыала.
Аркадий Новиков умнуллубат уобараһын үйэтитэн, бар дьон көрүүтүгэр Нюргустаана Владимировна уонна Николай Николаевич Филипповтар дьиэ кэргэттэрэ чочуйан таһаарбыт пааматынньыктара үйэ-саас тухары үтүө өйдөбүл буолан, көлүөнэттэн көлүөнэҕэ уос номоҕо буолуоҕа.
Пааматынньыгы үөрүүлээх быһыыга-майгыга арыйдылар Мэҥэ Хаҥалас улууһун дьокутааттарын Сэбиэтин бэрэссэдээтэлэ Иннокентий Иннокентьевич Андросов, «Дьаҥхаады нэһилиэгэ» тыа сирин түөлбэтин баһылыга Алексей Никитич Шарин уонна Аркадий Новиков уола Ян Аркадьевич Новиков.
«Үйэлэргэ өйдөбүл» диэн Аркадий Новиков туһунан иһирэх сэһэргэһии түһүлгэтин иилээн-саҕалаан ыытта СӨ үтүөлээх үлэһитэ, РФ Тыйаатырдарын диэйэтэллэрин сойууһун чилиэнэ Саргылана Саввична Адамова-Алтан Кыыс. Салгыы ахтыы киэһэтин Аркадий Новиков «Көөчөөн көрө» норуот тыйаатырын урукку, билиҥҥи артыыстара көрдөөх сценкаларынан, уус-уран самодеятельность кыттыылаахтара ырыанан-тойугунан сэргэхситтилэр.
Биһиги кэммит биһирэмнээх киһитэ Аркадий Новиков сырдык аата үйэлэргэ тыыннаах!
Аркадий Новиков үөрбүт мичээрэ,
Субу баар курдук сырдык мөссүөнэ,
Сцена маанылаах сырдык сулуһа –
Дойдутун аатыгар куруук тиллэр!
Өксөкүлээх Өлөксөй аатынан Норуоттар доҕордоһууларын дьиэтин пресс-сулууспата
Сонуннар
Ордук ааҕаллар
