Биһи кылаас тутаах киһибит

Эдэр-оҕо саастаргын бииргэ атаарбыт дьонуҥ хаһан баҕарар күндүлэр. Е.И. Курашов аатынан Чурапчы орто оскуолатыгар биир паартаҕа олорон үөрэммит, араас түгэннэргэ үгүстүк самнайдаспыт атаһым Гера Платонов бэс ыйын 1 күнүгэр үбүлүөйдээх 75 сааһын томточчу туолар. Аан дойдутааҕы Оҕо аймах күнүгэр.

Убайа Иннокентийдыын, эдьиийэ Настялыын кыра оҕо эрдэхтэриттэн аҕалара суох хааланнар, остуорас ийэлэригэр иитиллэн улааппыттара. Инньэ гынан, бэйэтэ да сэниэлээх уолчаан хайа да үлэни көрөн турбат, кыайыгас-хотугас, дьиэтигэр-уотугар «туһа киһитэ» этэ. Онуоха эбии, күөл уҥуор интэринээт-оскуолаҕа үөрэммитэ таайан, спортсмен бэрдэ, лаптаҕа сүгүн таптарбат аһарыгас, өрөспүүбүлүкэҕэ тиийэ тахсыылаахтык күрэхтэһэр, бэйэтин лаппа кыанар, күүстээх-күдэхтээх, сымса-быһый ыччат буола тыыллыбыта-хабыллыбыта. Уһун переменаларга оскуола аттыгар турар икки кыбартыыралаах, бытархай оҕолордоох Ньукулай, Елизавета Оконешниковтары кытта ыаллыы олорор эргэ самнархай дьиэлэригэр кэлэммит, ийэлэрэ Настаа куппут үүттээх чэйин иһэн, саахарга быламмыт күөрчэхтээх килиэп сиэн «өл хабарбыт».

Иннокентий Семенович Артемьев, Саха АССР үтүөлээх тутааччыта, Бочуот Знага уордьан кавалера, Анастасия Степановна, үлэ бэтэрээнэ, сэрии оҕото, тапталлаах кыра уоллара кэлин субуоталарга буолуталыыр үҥкүүлэргэ саҥа үөдүйэн эрэр «шейк», «твист» үҥкүүлэри көрүөхтэн  эриэккэстик, имигэстик толортуура харахпар бу баар. Нэһилиэктэргэ, тыа оскуолаларыгар гастролларбытыгар сценаттан түспэт ырыаһыппыт, үҥкүүһүппүт – Герабыт.

Тохсус-онус кылаастарга волейболга күүстээх, суоһарыылаах охсуулардаах буолан, улахан дьон сүүмэрдэммит хамаандатыгар киллэриллэн, остуол тенниһигэр тэйиэккэлэс маҕан кыра мээчик туора ыстанар эрийиилэринэн, сытыы быһыыларынан өрөспүүбүлүкэ «Урожайыгар» чөмпүйүөннээбитэ, Хабаровскайга, Читаҕа, Уһук Илиҥҥэ, Сибииргэ миэстэлэһэн, «Чемпион» диэн суруктаах значоктары иилинэн кэлэрэ. Спорду өрө туппут кылаас буоламмыт, буолуохтааҕын курдук ылынарбыт. Бастакы спортивнай разрядтаах спортсмен бэрдэ буолбута.

Ат сүүрэр алааһыгар буолуталыыр оройуон үөрэнээччилэрин сааскы-күһүҥҥү кростарыгар саамай ыарахан уһун дистанцияҕа сүүрэн бастаталыыра. Субуотунньуктарга «одинарка» матасыыкылыгар олороммут арҕаа Бараада үрэҕинэн хойуу тыаҕа тиийэрбит. Көхтөөх үлэ күөстүү оргуйара, көр-нар, ырыа-тойук көҕүлүттэн тутуллара. Герабыт мас хайытан бачырҕатарын, саһааннаан иһэрбит. Үөрэҕэр үчүгэй. Ыраас кыраһыабай буочарынан алгебра, химия уустук сорудахтарын иҥиннэрбэккэ суоттуура. Учууталларын кытта толлубакка хаадьылаһара.

Оскуола кэнниттэн МПМК-ҕа дьиэ тутуутугар үлэлээн, 3-4 разрядтаах болуотунньук аатын ылбыта. Тиихэй Акыйааннааҕы Байыаннай-Морской флокка подводнай лодкаҕа үс сыл сулууспалаабыта. Аан дойдуну биир гына тилийэ көппүтэ. Моряктарга иҥэриллэр саамай үрдүкү «Старшина 1-й статьи» званиелаах, «За дальний поход» бэлиэлэрдээх, хас да мэтээллээх, «Сулууспа туйгуна», «1-кы кылаастаах исписэлиис» дьоһун ааттары ылан эргиллибитэ. Эрилик Эристиин аатынан сопхуоска уонна эргиэн систиэмэтигэр оробуочайынан үлэлээбитэ. Новосибирскайдааҕы Потребкооперация институтун ситиһиилээхтик үөрэнэн, «товаровед» идэтин  баһылаабыта. Чурапчы оройуонун эргиэнин систиэмэтин бочуоттаах сынньалаҥҥа тахсыар диэри эппиэтинэстээхтик, үрдүк көрдөрүүлэрдээх  салайбыта.

Биир кылааска үөрэммит кыыспытыныын Дьячковская Милалыын билсиһэллэригэр, төһө да биир кылааска үөрэннэрбит, сурук таһааччы этим. Оччолорго таптал оннук сэмэй, килбик буолара. Ол «сырам-өҥөм» халтайга хаалбатаҕыттан үөрэбин. Билигин Герасим Степанович уонна Людмила Дмитриевна Платоновтар уон оҕолоро бары норуот хаһаайыстыбатын араас салааларын тутаах үлэһиттэрэ, сүүрбэччэ сиэннээхтэр, мурун бүөтэ хос сиэннэр улааталлар. Күннэрэ-ыйдара, күннээҕи олохторо-түбүктэрэ, сонуннара хас биирдии оҕолоруттан, сиэннэриттэн саҕаланар. Ыал сүрүн баайа-дуола оҕо буоларын Платоновтар ырылхайдык көрдөрөллөр. Оҕолор, сиэннэр кыттыһаннар, улахан дьиэлэрин аттыгар ийэлээх аҕаларыгар быйыл бэртээхэй саха балаҕанын бэлэхтээтилэр. Аныгы моһуонунан киллэриллибит үйэ сиэдэрэй тутуута тэлгэһэ киэргэлэ буолан кылбайар. Дэлэй, минньигэс астаах ыаллар күндү-мааны ыалдьыттарын итии чэйинэн, арыылаах алаадьынан көрсөргө бэлэмнэр. Бу санаатахха, Герасим Степанович Оҕо аймах аан дойдутааҕы күнүгэр төрөөбүт буолан, дьиэ кэргэн оҕо куттаах эбит диэххэ сөп. Эйэлээх-эккэлээх, түмсүүлээх ыал ийэтэ, эбэтэ Людмила Дмитриевнаҕа «Дьоруой Ийэ» үрдүк аата иҥэриллэн, иккиэн кылааспыт киэн туттуулара. Саха Өрөспүүбүлүкэтин «Любовь и верность», «Семейная доблесть» бэлиэлэринэн наҕараадаламмыттара, Ил Дархан, Бырабыыталыстыба, Физическэй култуураҕа уонна спорка министиэристибэ Бочуотунай грамоталарынан, Махтал суруктарынан, сыаналаах бэлэхтэринэн наҕараадаламмыттара. С.А. Новгородов аатынан Чурапчы орто оскуолатын Бочуотун кинигэтигэр киллэриллибиттэрэ.

Биэнсийэҕэ  тахсан баран Герасим Степанович сытыы өйүн-санаатын, эдэрдии эрчимин бүтүннүү уопсастыбаннай үлэҕэ анаата. Улуус спорка бэтэрээннэрин сэбиэтин бэрэссэдээтэлин, улуус үлэҕэ бэтэрээннэрин пленумун уонна Кырдьаҕастарын сэбиэтин, «Маарыкчаан» потребобщество сэбиэтин чилиэннэрин, Чурапчы нэһилиэгин дьокутаатын, Байыаннай-Морской Флот уопсастыбаннай тэрилтэтин бэрэссэдээтэлин быһыытынан түбүгэ, дьарыга элбэх.

Күрэхтэһиилэр, дьаһаллар, түмсүүлэр көҕүлээччилэрэ, сүрүн боппуруостары туруорсааччылара, олоххо киллэрсээччилэрэ. 2017 сылтан Арассыыйа суруналыыстарын сойууһун чилиэнэ. Спорт, ол иһигэр, остуол тенниһин, волейбол, ат сүүрдүүтүн, бырааттыы Доҕордуураптар, «Чурапчы – спорт туоната», Морфлокка сулууспа, эргиэн үлэтин, бииргэ үөрэммит оҕолорун тустарынан уо.д.а. 15 кинигэ, спорт хаартысканан быыстапкатын ааптардара. Өссө биир саҥа айымньыта күн сирин көрдө, «Чурапчы улууһун бочуоттаах гражданнара» кинигэтэ бу күннэргэ сүрэхтэниэҕэ.

Бар дьонун туһугар түбүктээх үлэтэ билиниини, сөптөөх сыанабылы ылаллар. Бастыҥ тэрийээччи буоларын көрдөрөр Саха Өрөспүүбүлүкэтин Бэтэрээннэрин сэбиэтин кубогынан, улуустааҕы «Саҥа олох» хаһыат И.С. Окоемов, спорду сырдатыыга А.К. Софронов ааттарынан суруналыыстарга бэриллэр бириэмийэлэр, улуус «Үрдэл» бириэмийэтин «Бастыҥ дьиэ кэргэн – 2022» номинация лауреаттара. Чурапчы улууһун уонна Чурапчы нэһилиэгин бочуоттаах олохтоохторо дьоһун ааттардаах.

Куһунан, балыгынан мичик аллайар Байанайын бэлэҕинэн дьиэ кэргэнин, чугас аймах дьонун хааччыйарын таһынан, тыанан-куоратынан оскуолатааҕы доҕотторун кытта күндүлүүр үтүө киһибит Герабыт буоллаҕа.

Эдэр-оҕо саастарыттан кылааспыт, оскуолабыт, нэһилиэгин, үлэлиир тэрилтэтин, оройуонун олоҕор-дьаһаҕар, үлэтигэр-хамнаһыгар, спордун сайыннарыыга олус көхтөөх, мэлдьитин инники күөҥҥэ сылдьар, уопсай дьыалаларга хамсатыылаах этиилэри оҥортуур, үлэ-олох сүрүн үөһүгэр сылдьар улахан дьиэ кэргэн тулхадыйбат тулааһынын, ыал аҕа баһылыгын Герасим Степанович Платоновы үбүлүөйдээх 75 сааһын томточчу туолбутунан итиитик-истиҥник эҕэрдэлиибит! Айар аартыгыҥ арыллан истин, чэгиэн-чэбдик буол диэн баҕа санаа бастыҥын аныыбыт, киэн туттабыт!