Бэйэҕэ эрэли саҕар бырайыак

Залог оройуонун Дьоруой Краснояров уулуссатыгар урукку мас кулуубу өйдүүгүт дуо? Ол мас кулууппут оннугар билигин икки этээстээх таас дьиэ дьэндэйэн, кэрэ эйгэҕэ дьону-сэргэни түмэр, киһи эрэ кэрэхсиэх араас тэрээһиннэр буолар кииннэригэр кубулуйбут.

Ып-ыраастык, кичэллээхтик күрдьүллүбүт үктэллээх кирилиэһи өрө дабайан, болдьоммут бириэмэни баттаһаары тиэтэйэ-саарайа хаамабыт. Көрөөччүлэр ким бэйэтэ, ким киһинэн, сорохтор тайаҕынан сирдэтинэн аа-дьуо ыксаабакка мустууларын үгэнэ.

Маанытык таҥныбыт кыттааччылар көрөөччү иннигэр тахсалларыттан улаханнык долгуйалларын кинилэр туттууларыттан таайаҕын. Буолбакка, куорат тыйаатырдарын улахан сыанатыгар көрөр-истэр, ааттаах-суоллаах артыыстардыын ыллыыр улахан эппиэтинэс да буоллаҕа! Кэнсиэр саҕаланыан иннинэ Суорун Омоллоон аатынан Опера уонна балет тыйаатырын артыыһа Григорий Петров урукку кэм ырыаларын  фортепианоҕа оонньуурун кэнсиэри кэтэһээччилэр бэркэ сэргээн иһиттилэр.

Чаһы иккини охсоотун кытта бу бырайыак төрүттээччитэ, тэрийээччитэ, СӨ култууратын туйгуна Алексей Потапов сценаҕа ойон тахсан: «Күндү доҕоттоор, сылын аайы ыытыллар «Сулустуун бииргэ ыллыахха» бырайыак быйылгы уратытынан аан бастаан холонооччулар бааллара, урут истэ илик дуэттарбыт кэлбиттэрэ уонна, биллэн турар, өрүү сыанаҕа күүтэр ырыаһыттарбыт», – диэн биллэрээтин кытта, ытыс тыаһа өрө хабылла түстэ.

Ол курдук, Иван Гоголев тылларыгар Валерий Ноев матыыбыгар «Сардааналыын көрсүһүү» ырыанан уопсастыба кэрэ лыҥкынакс куолаһа  Надежда Васильева уонна биллиилээх артыыс Григорий Петров сааланы ылан кэбистилэр.

Бу кэннэ Көрбөт уонна куһаҕаннык көрөр оҕолор оскуолаларыгар муусука учууталынан үлэлиир Эдуард Колодезников уонна Хотун Арылы таҕыстылар.

Анна Дива уонна Петр Андреев диэн биллэрбиттэригэр эмиэ ытыс тыаһа өрө хабылла түстэ. Ити курдук, хас биирдии толорооччу ураты куолаһа истээччини күүскэ да долгутар!

Анна Яковлева-Дива, СӨ Култууратын туйгуна, вокал уһуйааччыта, кыттааччы:

– Бу олус үчүгэй социальнай бырайыакка үөрүүнэн кыттабын. Доруобуйаларынан хааччахтаах дьон, чуолаан мөлтөхтүк көрөр дьон, муусука өттүгэр сүрдээх күүстээхтэр. Мин Петр Васильевич Андреевтыын бииргэ толоруубут табылынна дии санаатым. Холобур, Петр муусуканы таба истэр буолан, куолас арахсыытыгар бэйэтин киэнин бигэтик тутар. Күүстээх куоластаах.

Валентин Суздалов, кыттааччы:

– Ырыаны-тойугу кыра эрдэхпиттэн сөбүлүүбүн. Буолар кэнсиэртэргэ өрүү кыттабын. Аан бастаан «Малиновки заслышав голосок» диэн ырыаны толорбутум. Ордук нууччалыы ырыалары талар эбиппин.

Быйылгы патриотизм уонна Улуу Кыайыы 80 сылынан Леонид Анциферовтыын «Смуглянка»-ны толордубут. Биллэн турар, миигин Алексей Алексеевич бэлэмнээтэҕэ дии. Оттон саамай улахан сыанабыл – көрөөччү ытыһын тыаһа. «Браво» диир хаһыылар киһини өссө кынаттыыллар.

Инна Тарабукина, кыттааччы:

–  Бу бырайыакка кыттыбыппыттан сүрдээҕин үөрэбин. Репертуарбын уонна ыллаһыахтаах сулуспун Алексей Потаповтыын сүбэлэһэн талбыппыт. Онон Николай Андросовтыын «Быраһаай, оскуолам» ырыаны толордубут. Миэхэ кыра эрдэхпиттэн ырыа – олоҕум аргыһа. 2016 с. улахан кыыһым олохтон күрэммитин кэнниттэн өр ыллаабакка сылдьан бараммын Алексей Алексеевич көмөтүнэн ырыабар төннүбүппүттэн үөрэбин. Хаһан баҕарар, ханна баҕарар көрөөччү иннигэр тахсыы долгутуулаах. Бу бырайыак икки бүк долгутуулаах буолла. Бэйэҕэ эрэли саҕар уонна үрдүккэ кынаттыыр.

Түгэнинэн туһанан бу тэрээһини тэрийбит, сүүрбүт-көппүт дьоммутугар махтанабыт. Ырыа дьоро күнүн бэлэхтэспит артыыстарбытыгар ис сүрэхпититтэн махталбытын тиэрдэбит.

Татьяна Данилова, көрөөччү:

– Кэнсиэри көрө кэлбит киһи этим эрээри, бүгүҥҥү күн бэлиэ күнүн ахтан-санаан туран Улуу Өктөөп күнүнэн эҕэрдэлээн ыллыахпын баҕардым, – диэн баран Татьяна Исаковна сыанаҕа тахсан ыллаан эйээртэ:

Бүгүн манна муһуннубут,

Ааспыт кэми санастыбыт,

Оҕо буолан оонньостубут,

Онтон олус дуоһуйдубут.

Николай Лукич Туприн-Кэһиилээх Уола, көрөөччү:

– Мин ыраах сытар Анаабыр оройуонуттан куоракка көрдөрүнэ кэлэ сылдьабын. Туох даҕаны ааттаах үчүгэй кэнсиэри истэн өрө көтөҕүллүү буолла. Харахтарынан инбэлиит дьоҥҥо үрүҥ торуоска төрүт көрбөтүн бэлиэтэ. Онон мин, көрбөтөрбүн даҕаны, хас биирдии толорооччуну олус сэргээн иһиттим. Туран үҥкүүлээҥ диэтэхтэринэ, хайдах эрэ үҥкүүлэһиэх санаалар эмиэ кииртэлээн ыллылар. Онон сырдык, ыраас бырайыак сылын аайы маннык саҥаттан саҥа сулустары уматтын диэм этэ. Оһуобай ырыаһыттардаах кэнсиэрт!

Дьокуускай куораттааҕы көрбөттөр уонна мөлтөхтүк көрөр дьон уопсастыбаларын иһинэн кэрэ эйгэҕэ сыстан бэйэлэрин кыахтарынан кыттар дьон  уонна  сыл ахсын үгэс курдук буолар бу бырайыак туһунан Алексей Потаповтан кэпсииригэр көрдөстүбүт.

– 80-90-с сылларга оҕо сылдьан ырыа алыптаах эйгэтигэр умсугуйуум манна турбут мас кулууптан саҕыллыбыт буолуохтаах. Биһиги уопсастыбабыт дьоно үгүстэрэ дьиэлэригэр олорор дьон. Онон манна кэлэн аралдьыйаллар даҕаны, дьарыктаналлар даҕаны. 14-15 аҥаардас вокалист дьонноохпут. Кинилэр ортолоругар Рома Винокуров, Алена Пухова, Петр Андреев, Саина Сивцева, Эдуард Колодезников, Дьулуур Бандеров, Мичил Кыыдаан Моисеев, о.д.а. ааттарын ааттаталыы туруохха сөп. «Эйгэ» диэн түмсүүлээхпит,  «Сарыал» диэн квартет, «Талба» кыргыттар, «Созвучие» баянистар ансаамбыллара бааллар. Дьэ бу түмсүүлэрбит араас таһымнаах тэрээһиннэргэ өрүү кытталлар. Ыытылла турар ый чэрчитинэн «Абырал» профилакторийга кэнсиэртээтибит.

Бу бырайыак сүрүн сыала – бэйэни холонон көрүү. Ол курдук Надежда Васильева Григорий Петровтуун, Эдуард Колодезников Хотун Арылылыын, Петр Андреев Анна Дивалыын, Инна Тарабукина Николай Андросовтыын,  Валентин Суздалов Леонид Анциферовтыын, Алена Васильева Олимпиялыын, Георгий Семёнов Егор Толбоновтуун, Валерий Корнилов Евгений Прокопьевтыын ыллаан, бу күн хас биирдиилэрэ сулус буолан сандаардылар.

Дьэ, бу курдук кэрэ эйгэ биир дьоро күнэ өрө көтөҕүллүүлээхтик  ааста.