Бэйэ аһын булар уустук буолла

Ол эрээри куорат сорох түөлбэлэригэр дьиэҕиттэн таҕыстыҥ да олохтоох үрүҥ аһы, эти булар уустук буолла.

Мин ЯГИТИ оройуонугар олоробун, оптуобуһунан айанныыр тохтобулум – ЯКСМК. Биһиги түөлбэҕэ тохтобулбут таһыгар “Таатта” олохтоох аһы оҥорон таһаарааччы киоската баара. Онно чэпчэки сыананан күөрчэх ытыйар чөчөгөй, ынах арыыта, иэдьэгэй, суорат, сүөгэй барыта атыыланара. Ону таһынан буотарах, эт астан тоҥ бэлэм оҥоһук барыта баара. Бу күһүҥҥүттэн ол киоскабыт сабыллан бары да хомойдубут, атыыһыт суох үһү. Холобур, онно ыраах Тааттаттан кэлэр чөчөгөй (сливки) 270 солкуобайтан кыра тахса эбит буоллаҕына, аҕыйах хаамыылаах “Гурман” маҕаһыыҥҥа, чугас айаннаах, үчүгэй суоллаах Горнай чөчөгөйө 350-тан тахса турара.

Онтон кэлэр “Архив” тохтобулга саха эйэҕэс кыргыттара үлэлиир кыракый маҕаһыын баара. Онно Ньурбаттан, Элгээйиттэн, Чурапчыттан, атын да улуустартан кэлэр, сүрдээх астына сылдьар сылаас тохтобулбут маҕаһыына бу күһүн сабыллан, кэлии омуктар маҕаһыыннара буолан турарыттан олус хомойдубут. Онон тэйиччи баар Бааһынай ырыынагар айанныыбыт да, онно сыана эмиэ ыарахан. Онтон “Малай базар” ырыынагы булан, таатталарбыт бэйэлэрин сыаналарынан атыылыылларын билэн, онно тиэстэр буоллубут. Айанныах диэтэххэ син ыраах. Хайыахпытый, ол оннугар чэпчэки, олус минньигэс бэйэ аһын нэдиэлэтээҕибитин атыылаһан кэлэбит.

Бүгүҥҥү күҥҥэ “Малай базар” ырыынакка баар сыананы билиһиннэриэм.

“Таатта” СПК

Сливки 30% – 292 солк.

Суорат 2,5% – 165 солк.

Кефир 2,5% – 165 солк.

Сүөгэй 20% – 226 солк.

Ынах арыыт (кг) – 1300 солк.

“Мүрү Ас” Уус Алдан СПССПК

Суорат – 130 солк.

Кефир – 130 солк.

Йогурт – 75 солк.

Чохоон – 235 солк.

Сүөгэй 15% – 195 солк.

Ынах арыыта (кг) – 1300 солк.

Куорат дьоно, олохтоох бородууксуйаны хантан атыылаһан олороҕут?