Бэтэрээннэр куорат баһылыгар махтаналлар

Евгений Григорьев ахсынньы 25 күнүгэр буолан ааспыт уопсастыбаннаһы кытта бырааһынньыктааҕы көрсүһүүтүгэр дьокутааттар, куорат бочуоттаах олохтоохторо, анал байыаннай дьайыы кыттыылаахтара – Дьокуускай куораты кытта олохторун, дьылҕаларын ситимнээбит дьон ыҥырыллан кэлбиттэр.

Кинилэр ортолоругар «Сэрии оҕолоро» Арассыыйатааҕы уопсастыбаннай тэрилтэ бырабылыанньатын чилиэнэ, үлэ бэтэрээнэ, СӨ норуотун хаһаайыстыбатын үтүөлээх үлэһитэ, «Аҕа дойду иннигэр үтүөлэрин иһин» уордьан 2-с истиэпэнин кавалера, СӨ Бастакы Бэрэсиьиэнэ М.Е. Николаев «Во славу и пользу Республики» пуондатын лауреата, өр сылларга «Тыгын Дархан» уопсастыбаннай аһылык тэрилтэтин салайбыт Мария Габышева сырытта.

– Ураты ситиһиилэрдээх сыл ааһан эрэр. Биһиэхэ, бэтэрээннэргэ, Кыайыы 80 сылынан сүҥкэн болҕомто уурулунна. Ол иһигэр «Центральнай» киинэ тыйаатырын кэннигэр түмсэ түһэн сэһэргэһэн, сынньанан ааһар, мустар искибиэрдэннибит. Куорат киинигэр маннык бэртээхэй бэлэҕи оҥорбут баһылыкпыт Евгений Николаевичка уонна кини хамаандатыгар махталбытын биллэрэбит. 2032 сылга диэри былааннаммыт маастар-былааны тиһэҕэр тиэрдэргитигэр баҕарабыт. Куораппыт 400 сылын бэлиэтиирбит букатын аҕыйах сыл хаалла, – диэтэ ытык саастаах Мария Николаевна.

Бырааһынньыктааҕы көрсүһүү бары кыттыылаахтара махтал суруктарынан, бочуоттаах бэлиэлэринэн, «Килбиэннээх үлэ куората» мэтээлинэн, «Барыта Кыайыы туһугар» өйдөбүнньүк бэлиэнэн наҕараадаланнылар.