Бэс ыйын 1 күнүттэн көрүллэр саҥа төлөбүргэ ким сайабылыанньа биэриэн сөбүй?

Туох төлөбүрэй?

Судаарыстыба маннык ньыманан физическэй сирэйдэргэ эрдэ төлөөбүт НДФЛ нолуоктарын хаттаан ааҕан, дьиэ кэргэҥҥэ төннөрөр (кешбек курдук) суолу тобулбут. Ол эбэтэр эрдэ 13% төлөммүт НДФЛ-тан судаарыстыба чэпчэтиилээх 6%-нан суоттаан ылар уонна ол араастаһыытын дьиэ кэргэҥҥэ төннөрөр.

Ким хапсар бырааптааҕый?

*Бастатан туран, төлөбүргэ икки уонна онтон элбэх 18-гар эбэтэр күнүскү үөрэххэ үөрэнэр 23-гэр диэри саастаах оҕолордоох төрөппүттэр хапсаллар.

*Иккиһинэн, ааспыт 2025 сылга кинилэр үлэлээбит уонна НДФЛ нолуогун төлөөбүт буолуохтаахтар.

*Дьиэ кэргэн орто дохуота региоҥҥа олохтоммут муҥутаан тиийинэн олоруу биир киһиэхэ тиксэр кээмэйин 1,5 ордук аһарыа суохтаах.

*Алимеҥҥа иэһэ суох буолуохтаахтар.

*Төрөппүттэр иккиэн үлэлээх, 13% НДФЛ төлөөбүт буоллахтарына, төлөбүрү иккиэн ылар бырааптаахтар, маннык кээмэйдээх НДФЛы биир эрэ төрөппүт төлөөбүт түгэнигэр – кини эрэ ылар.  

Ким хапсыбатый?

НДФЛы кытта ситимнээх төлөбүр буоларын быһыытынан, биллэн турар, официальнай үлэтэ суох, бэйэ дьарыктаах төрөппүттэр, 13%-тан атын кээмэйдээх (чэпчэтиилээх) нолуогу төлүүр урбаанньыт төрөппүттэр хапсыбаттар.

Сайабылыанньаны биэрии бэрээдэгэ

Сайабылыанньаны сылга биирдэ бэс ыйын 1 күнүттэн алтынньы 1 күнүгэр диэри Госуслуги портал эбэтэр Социальнай пуонда нөҥүө биэриэххэ сөп.

Суума хайдах ааҕылларый?

Төлөбүр суумата хас биирдии түгэҥҥэ араастаһар. Ону маннык суоттуохха сөп:

Төлөбүр =  13%-наах НДФЛ − 6%-наах НДФЛ

Ол эбэтэр, төрөппүт официальнай дохуота төһөнөн үрдүк да, төлөбүр кээмэй соччонон үрдүк.

Өйдөөҥ!

Төлөбүр сайабылыанньаны биэрдэххэ эрэ оҥоһуллар! Дохуот кээмэйин сыл аайы бигэргэтэн, саҥардан иһиллиэхтээх.