Бэс ыйын 1 күнүттэн дьиэ кэргэн төлөбүрүгэр сайабылыанньаны ылыы саҕаланыаҕа

Бу көҕүлээһин икки уонна онтон элбэх оҕону иитэр кыра дохуоттаах Арассыыйа ыалларыгар барыларыгар ананар. Бу туһунан Арассыыйа СӨ Социальнай пуондатын Саха сиринээҕи управлениетын салайааччытын солбуйааччы Марк Унаров муус устар 7 күнүгэр ыытыллыбыт брифиҥҥэ эттэ.

Төлөбүрү ким ылар бырааптааҕый?

Төлөбүрү ылар туһугар ыаллар хас да ирдэбилгэ эппиэттиэхтээхтэр:

• Үлэ: Төрөппүттэр үлэлээх уонна сайабылыанньа биэрии иннинээҕи сылга дохуот нолуогун (НДФЛ) төлөөбүт буолуохтаахтар.

• Гражданство: Сайабылыанньа биэрээччи уонна оҕолоро РФ гражданнара уонна дойду бастайааннай олохтоохторо буолуохтаахтар.

• Дьиэ кэргэн састааба: Кэргэнниилэр, сокуоннай саастарын туола илик оҕолор, 23-гэр диэри саастаах оҕолор (күнүскү үөрэххэ үөрэнэр уонна ыал буолбатах буоллахтарына) ахсааҥҥа киирэллэр.

• Иэһэ суох: Төрөппүттэр оҕо алименыгар иэстэрэ суох буолуохтаахтар.

• Баай-дуол: Үп-харчы уонна дьиэлэрин-уоттарын туругар сыанабыл ыытыллар.

Дохуот таһыма

Сүрүн усулуобуйалартан биирдэстэринэн дьиэ кэргэн биир киһиэхэ тиксэр орто дохуота буолар, ол дохуот киһиэхэ тиксэр муҥутаан тиийинэн олоруу алын кээмэйин 1,5 төгүл куоһарыа суохтаах. Саха сиригэр бу суума маннык:

• Бастакы (хотугу) зонаҕа – 50 190 солк.

• Иккис зонаҕа – 42 039 солк.

2026 сыллааҕыны ааҕыыга 2025 сылга нолуок вычетын дохуота учуоттанар.

Суумата уонна ылыы бэрээдэгэ

Төлөбүр суумата дьиҥнээх төлөммүт тус дохуот нолуогун (13%) уонна 6% кээмэйинэн ааҕыллыбыт нолуок араастаһыытынан ааҕыллыаҕа. Ол курдук, дьиэ кэргэҥҥэ төлөммүт дохуот нолуогуттан 7% төннөрүөхтэрэ.

Суоттааһын холобура:

Дьиэ кэргэн сыллааҕы дохуота: 1 000 000 солк.

Төлөммүт НДФЛ (13%): 1 000 000 х 0,13 = 130 000 солк.

Чэпчэтиилээх НДФЛ ыстаапката 6% тэҥ түгэнигэр, 1 000 000 6%-на = 60 000 солк.

Оччотугар дьиэ кэргэҥҥэ сылын аайы ананар биир кэмнээх төлөбүр суумата: 130 000 солк. – 60 000 солк. = 70 000 солк.

Сиһилии Социальнай пуонда саайтыгар билсиҥ: https://sfr.gov.ru/branches/sakha/news/~2026/04/07/280173

Сайабылыанньаны тутуу уонна көрүү болдьохторо

Сайабылыанньаны туттарыы кэмэ отчуоттуур сыл кэнниттэн бэс ыйын 1 күнүттэн алтынньы 1 күнүгэр диэри буолуоҕа. Сайабылыанньаны көрүү болдьоҕо 10 үлэ күнэ, ол гынан баран чуолкайдааһын наада буоллаҕына, 20 үлэ күнүгэр диэри уһатыллыан сөп. Төлөбүрү СӨ Социальнай пуондатын салаата оҥоруоҕа.

Бу социальнай өйөбүл миэрэтэ дьиэ кэргэттэргэ улахан көмө буолуоҕа, оҕону иитиигэ эбии үбүнэн-харчынан көмөлөһүөҕэ.