Бэс куоппаһын туһаныы

Биһиэхэ “Алгыс От” отоһут уһуйаанын выпускнига, “Алгыс От” өрөспүүбүлүкэтээҕи отоһуттар түмсүүлэрин чилиэнэ, Горнай улууһун олохтооҕо Лена Сорокина интервьюта тахсан турар: https://kiinkuorat.ru/articles/emteeh-otu-homuyar-kemi-m-chch-tutuma

Бэс куоппаһын бэс ыйын бастакы аҥаарыгар 3-5 эрэ күн устата хомуйуохха сөп. Быйыл бэс ыйын 7-11 күннэригэр куоттарбакка ситэрин кэтээн көрөн, кэмин табан хомуйабыт. Онтон атын хойутуубут.

Билигин кураанах кэмҥэ хомуйабыт. Ардах кэннэ, сииктээх кэмҥэ хомуйан хатара сатаатахха сиигирэн түүнүгүрүөн сөп.

Тыһыта кыһыл дьүһүннээх, атыыра - саһархай. Атыыра ордук элбэх куоппастаах - ону хомуйабыт.

Элбэх бэстэрдээх сиртэн хомуйабыт. Соҕотох туспа турар бэс туорааҕын тоноон ылбаппыт.

Маҥан ватманы кытыытын токурутан (бортиктыыбыт), онно тэнитэн хатарабыт. 3-4-үс күнүгэр куоппаспыт тахсан саҕалыаҕа. Ону кэтэһэрбитигэр наар аргыыйдык сахсыйан, хамсатан биэрэ сылдьабыт.

6-7-ис күнүгэр бастаан улахан хайаҕастаах, онтон кыра хайаҕастаах сиидэнэн сиидэлиибит. Ньимиччи хаппахтанар иһиккэ кутан харайабыт.

Куоппас хаҕын бырахпаппыт. Кыһыҥҥыга хаһаанан, чэй оҥостон иһэбит.

Отоһуттар бэс куоппаһын "көмүс бороһуок" диэн ааттыыллар. Оннук көмүскэ тэҥнээх күндү буолар гына элбэх туһалаах.

Туһата олус элбэх: айылҕа биостимулятора, 200-кэ тиийэр туһалаах эттиктээх, битэмииннэртэн саҕалаан аминокислоталарынан, минералларынан баай. Иммунитеты бөҕөргөтөр, сэниэ эбэр, антиоксидант быһыытынан туһалаах.
Иммунитекка уонна уопсай турукка дьайыыта: сылайбыты аһарар, күүрүү (стресс) кэмигэр көмөлөһөр, эт-хаан өттүнэн тулуурдаах буоларга өйөбүл буолар.
Састааба олус баай: А группа битэмииннэрэ бары, B, D3, C,
30 минерал (калий, цинк, селен, железо о.д.а.) бааллар.
Ис-үөс уонна тымыр үлэтигэр: ис үлэтин сааһылыырга туһалаах, холестерины намтатар, быары харыстыыр.

Куоппаспытын 1 ч.ньуоска сылаас ууга суурайан туттабыт. 20-чэ мүнүүтэ сылаас ууга туран куоппас хаҕа алдьанар. Споропеллинин диэнэ тахсан ууга суураллар. Иһэрбитигэр кыра-кыралаан, амтаһыйан иһэбит. Биирдэ ыйыстан кэбиһиллибэт.

Эбэтэр иккис ньыма: куоппаһы натуральнай мүөккэ булкуйабыт.