Бэртээхэй сир баар эбит

Дьокуускайга “Шаурма” киоск, павильон лаппа элбэҕин бэлиэтии көрөҕүт дуу? Ордук кэнники кэмҥэ ардах кэннинээҕи хойуутук үүнэр тэллэйи саната эбилиннилэр. Холобур, 2-ГИС сыһыарыыга да киирэн, “шаурма” диэн суруйдахха, 83 салаа (филиал) баара көстөр. Дьиэҕэ тиэрдэн биэриэн сөптөөҕө – 61. Дьиҥинэн, шаурма туох куһаҕаннаах буолуой? Сэҥээрии улахан буолан, элбээн эрдэхтэрэ.

Ол да буоллар, аҕыйаҕа суох киһиэхэ: “Бу биһиэхэ хаһан шаурма курдук ыл да сиир гына бэлэмнэммит саха төрүт аһа дэлэйэрэ буолуой?” –  диэн бүөм санаа киирэн ылара эрэбил. Омук доруобуйата төрүт аһыгар сытара – дакаастамммыт чахчы.

Соторутааҕыта Сэргэлээх уопсайдарыттан чугас, сөбүгэр сыаналаах, сахалыы астаах “Таптал” диэн кафе дуу, остолобуой дуу аһыллыбытын истэн аһарбытым.

Биир үтүө күн ол сир чугаһыгар сылдьыбычча, илэ харахпынан көрөргө, биһирии көрдөхпүнэ, таарыйа аһаан тахсарга санаммытым.

Билбэт киһи, таһыттан көрөн, манна аһыыр сир баарын тута билиэ, сэрэйиэ да суох курдук. Икки этээстээх туһунан турар бэрт боростуой тутууга баар эбит. Үөһэ этээһигэр бэрт сэмэй “Таптал” диэн суругу иҥиннэрбиттэрин чугаһаан эрэ баран көрдүм. Туох кистэлэй, үрдүк тимир кирилиэһи: “Арааһа, бачча сир көстүбүтүгэр махтал буолуо”,- диэн кэтэх санаа аргыстаах, санаабар, балайда өр дабайдым.

“Таптал” кафе-остолобуой дэнэр, үлэ күннэригэр сарсыарда 11 чаастан киэһэ 20 чааска диэри үлэлиир эбит. Оттон субуотаҕа – күнүс 12 чаастан киэһэ 19 ч. диэри. Өрөбүл – анал хааччыйыы (спецобслуживание) күнэ буолара суруллубут. Ол эбэтэр банкеттыыр саала быһыытынан да үлэлиир бадахтаах.

Иһирдьэ киириигэ уун утары ойоҕосторунан турар сахалыы таҥастаах, бэйэм саҕа, дьабака бэргэһэлээх, чээлэй күөх таҥастаах Далбар Хотун уонна бухатыыр улахан “куукулаларын” көрөн, аймахтарбын көрбүттүү, үөрэн сэгэйдим. Иһигэр киирдэххэ, хата, кэҥэс эбит. Үлэһиттэртэн ураты биир-икки киһи баара.

Истиэнэҕэ аҕыйах сахалыы хартыына ыйаммытын сэргээн одууластым. Кэлбит сыалбын толорон,  бастаан астары, менюну үөрэттим.

Дьэ, туох баар эбитий? Ордук сэргээбитим: ис мииннээхтэр  (220 солк.). Борщтара – 230 солк., дьиэтээҕи миин – 200 солк, куурусса миинэ – 180 солк., балык (форель) миинэ ­­– 200 солк.

Астаныан сүрэҕэлдьиир устудьуон саатар истипиэндьийэ ылбыт дьоро күнүгэр биирдэ эмэ манна кэлэн, дьиэтээҕини санатар аһы аһаан, "ис бырааһынньыга оҥостуон” сөп курдук эбит. Ити санааттан сиэттэрэн, ыһыллыы-тоҕуллуу 90-с сс., ас сүрүн көрүҥэ барыта толуон буолбут, “Рама” арыы баҕалаах устудьуон сылларбын, оччолорго үгүстэри абыраабыт 5-с остолобуойга босхо аһатар устудьуон Профилакторийын санаан, эмиэ да дьоллонон, эмиэ да сонньуйан ыллым. Арай оччолорго маннын сир баар эбит буоллун? Чэ, ол да буоллар, кэрэ кэм этэ.

Иккис бүлүүдэттэн плов (250 солк.), ыһаары (260 солк.), “запеканка” (350 солк.), шин-рамен (380 солк.) көстөллөр. Дьэ, уонна 450 солк. “Индигирка” салаат баар эбит! Эрэстэрээҥҥэ төһө сыаналыыҕын билэр буолан, итиннэ эмиэ эмис “+”-ү туруордум.  

Бурдук астан – эттээх бирэски (85 солк.), хортуоппуйдаах бирэски, пицца, сгущенкалаах алаадьы, билинээ, “ушки”. Фаст-фуд да, биллэн турар, баара: гамбургер, чизбургер, сэндвич, фри хортуоппуй, наггетсы. Сыаналара 180 -380 солк. халбаҥныыр. Холобур, 6 устуука наггетсы 200 солк. эбит.

Салааттан “Оливье”, “Крабовай”, “Капустнай” уонна “Фунчоза” бааллар, сыаналара 110-130 солк. иһинэн халбаҥныыр. Итии астан гуляш, сытыы соустаах куурусса, эт кэтилиэт, тефтель, сарделька баара. Сыаналара 100-200 солк. иһинэн халбаҥныыр.

Гарнир да арааһа аҕыйаҕа суох. 60-80 солк. иһинэн сыаналаахтар. Чэй, муорус, хомпуот, сок биир ыстакаана 50 солк., кофе – 70 солк. (бэйэҥ оҥостуоххун, бэлэм бакыаттааҕы да куттуохха сөп).

Эрэспиэскэлии сылдьарбын биллэримээри иҥэн-тоҥон ыйыталаһа сатаабатым. Сахалар, Бүлүү, Үөһээ Бүлүүттэн төрүттээхтэр кафе-остолобуойдара буоларын, үлэлээбиттэрэ ый да буола илигин биллим. Ол да буоллар дьонуҥ хайыы үйэ бастайааннай килийиэннэммиттэр үһү. Сахалыы ылбаҕай       ырыаны истэ-истэ, астына аһаан, тотон таҕыстым. Арай таас иһит оннугар биирдэ туттуллар иһити тутталлара соччото суох эбит. Ол эрээри, этэргэ дылы, Москуба биирдэ тутуллубатаҕа.

Маннык саҥа ылсан үлэлээн эрэр дьоҕус уонна сөбүгэр сыаналаах остолобуойдарбытын өйөөн, ол аата, онно үгүстүк сылдьан, эргитэр үптэрэ улаатарын ситиһэрбит буоллар бэрт буолуо этэ. Оччотугар олохтоох астааччылар элбээн, кыаҕыран, сыыйа да буоллар хаачыстыбалаах, бэйэ бородууксуйатыттан астанар төрүт аспытын эбиллэн иһиэ этэ.

“Таптал”... Аата да үчүгэйэ бэрт.